भांगरभूंय | प्रतिनिधी
कला अकादमींतली घडणूक : वेल्डिंगाची किटाळी थारली कारण
भांगरभूंय । प्रतिनिधी
पणजी : पणजे कला अकादमींत उबारिल्ल्या तात्पुरत्या लांकडी सजावटीच्या स्पॉन्जाक उजो लागपाची घडणूक सोमारा सांजे वेळार घडली. पणजी शारांत 12 डिसेंबर सावन सेरेंडिपीटी आर्ट फेस्टिवल 2005 सुरू जाता. ह्या फेस्टिवला खातीर तात्पुरती लांकडाची सजावट करपाचें कामा चालू आशिल्लें. हे सजावटीक उजो लागिल्ल्यान लाखांनी रुपयांचें लुकसाण जालां.
वेळकाळ वळखून कला अकादमीच्या कर्मचाऱ्यांनी तत्काळ उजो पालोवपाक सुरवात केल्ल्यान व्हड अनर्थ टळ्ळो. अशेच तरेचो उजो पोरूं 8 डिसेंबराक लागिल्लो. त्या वेळार आयनॉक्स थिएटरा कडेन उबारिल्ले लांकडी बांदकामाक उजो लागिल्लो.
पणजी उजो पालोवपी दळान दिल्ले म्हायती प्रमाण, पणजे कला अकादमींत उजो लागिल्ल्याची म्हायती सोमारा 8 डिसेंबराक दनपारां 4.48 वरांच्या सुमाराक उजो पालोवपी दळाच्या नियंत्रण विऊगाक मेळ्ळी. ते उपरांत ही म्हायती पणजी उजो पालोवपी दळाक दिली. पणजी उजो पालोवपी दळाचे अधिकारी आनी जवानांनी घडणुकेचे सुवातेर धांव घेतली.
12 डिसेंबर सावन पणजे वेगवेगळ्या वाठारांनी सेरेंडिपीटी आर्ट्स फेस्टिवल 2025 सुरू जातलो. ते खातीर व्हड प्रमाणांत पूर्वतयारी चालू आसा. हे मजगतीं, कला अकादमींत तात्पुरत्या लांकडी बांदकाम उबारपाचें काम चालू आशिल्लें. थंय वेल्डिंगाचें काम चलतालें. त्या वेळार वेल्डिंगाची किटाळी तात्पुरत्या लांकडी बांदकामाच्या स्पॉन्जाचेर पडली आनी उजो लागलो, अशी प्रत्यक्षदर्शी कामगारांनी म्हायती दिली.
उजो लागले उपरांत कला अकादमीच्या कर्मचाऱ्यांनी वाठारांत आशिल्ले फायर हायड्रंट यंत्रणांचो वापर करून उज्यचेर नियंत्रण मेळयलें आनी उजो दुसरे कडेन पातळपा पसून वाटायलो. हाका लागून व्हड अनर्थ टळ्ळो. मजगतीं, उज्याचे घडणुकेची दखल घेवन उजो पालोवपी दळाचे उत्तर गोंय विभागीय अधिकारी श्रीपाद गांवस आनी हेर अधिकाऱ्यांनी पळोवणी केली. त्या वेळार संबंदितांनी कसलेच तरेची प्रतिकाबंधक उपाय येवजण करूंक नाशिल्ल्याची म्हायती मुखार आयली. ताका लागून उजो पालोवपी दळ आयोजकांक प्रतिबंधक मार्गदर्शक तत्वां जारी करपाचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
