भांगरभूंय | प्रतिनिधी
पणजी: सेरेंडिपिटी कला महोत्सवांत प्रेक्षकांनी संगीत, कार्यशाळा, नाटक आनी नृत्य हांचो लाव घेतलो. आझाद मैदानार हेलन आचार्य हांणी आयोजीत केल्ल्या ‘इंटरनल इकोज: रेझोनन्स ऑफ हार्ट वीथ हेरिटेज’ ह्या विशेश कार्यावळीन दिसाची सुरवात जाली. ह्या प्रदर्शनांत भारताच्या परंपरीक आनी लोकसंगिताचो उत्सव मनयलो. स्ट्रिंग, ड्रम आनी हॉर्ना सारक्या वाद्यां वरवीं संगीत कशें आनंदाक जोडून घेतां हें सुंदरपणान दाखयलें.
द फूड लॅबांत ‘इंटींग सिव्हीड’ ही अनोखी कार्यशाळा एडिबल इश्यूज हांणी आयोजीत केल्ली. जाचें फुडारपण गॅबिएला डिक्रुझ, द गूड ओशनाचे चैतन्य चौगुले आनी शेफा प्रियांका सरदेसाय हांणी केलें. हे कार्यशाळेंत वांटेकार जाल्ल्यां खातीर संवसारीक खावपाच्या पदार्थांनी थळाव्या घटकांचो आस्पाव कसो करूं येता हाचें खोलायेन विश्लेशण केलें. तशेंच शाश्वत आनी पर्यावरणपूरक अन्न पद्दतींचेर प्रेरणादयी आनी अर्थपूर्ण चर्चा घडोवन हाडली.
आर्ट पार्कांत संगीत सादरीकरणान प्रेक्षकांची मनां जिखलीं. Mrtn The Mrtn आनी द मार्शन्स हांणी लायव्ह आनी इलेक्ट्रॅनीक संगिताची अनोखी सांगड घालून एक बरो सर्जनशील आनी अद्वितीय सादरीकरण केलें. तांच्या ह्या अभुतपूर्व कार्यान गोंयच्या संगीत मळार नवी उर्बा निर्माण केली.
थिएटराच्या मळार ‘बी-लवेड: थिएटर, म्युझीक, क्विअरनेस आनी इश्क!’ ह्या नाटका रसिकांचेर मोनेळ घोलाे. क्वासार ठाकोर पदमीस आनी शंकर वेंकटेश्रन हांणी क्युरेट केल्लें हें 90 मिणटांचें सादरीकरण पोरण्या जीएमसी कॉम्प्लेक्सांत रंगलें. कथाकथन, कविता, संगीत आनी हालचालींच्या विशेश मिश्रणान सादर केल्ल्या ह्या नाटकान भारततांतल्या क्विअर प्रेमाभोंवतीच्या गतिमान आनी विकसीत जावपी संवादाचो खोलायेन आनी संवेदशील सोद घेतलो.
सेरेंडिपिटी कला महोत्सवाचें मुखेल आकर्शण म्हणल्यार कला, जी ह्या महोत्सवाच्या दरेक कोनशांनी जाग्याजग्यांनी पळोवंक मेळटा. कारंज्यात देगेर ‘लिटोरल स्टेट्स ऑफ बिइंग’ पळोवपा पसून ते भुपेन कक्कराच्या पूर्वलक्ष्यपरक प्रदर्शना मेरेन आनी मुडीयेट्टू सादरीकरणा मेरेन दरेक अणभव रोमांचक आसा. हांव काळखांत चिकणमातेयचीं कामां, ‘शाही तुकरा’ सादरीकरण आनी कला मळा वेल्या ‘रिलीफ कॅम्प’चे दर्शन घेवपाक उत्सूक आसा. पूण सगल्यांत म्हत्वाचें म्हणल्यार म्हाका सेरेंडिपिटी कला महोत्सवांत भोंवतना अजपीत जावप खूब आवडटा अशें क्वासार ठाकोर पदमसी हांणी म्हणलें.
सेरेंडिपिटी कला महोत्सव 2024 चो चौथो दीस हो दायजाचो सांबाळ, समाजीक आव्हानां आनी अर्थपूर्ण संवादाक प्रोत्साहन दिवपी कलेच्या सामर्थ्याचें बरें उदाहरण आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
