भांगरभूंय | प्रतिनिधी
– एका म्हयन्यांत सर्वेक्षण पुराय करपाचें उद्दिश्ट
– अतिक्रमणांचे सर्वेक्षण जावपी पयली कोमुनिदाद
भांगरभूंय । प्रतिनिधी
पणजी: खंडपीठाच्या आदेशा प्रमाण सेरूला कोमुनिदादींतल्या अतिक्रमणांचें आयच्यान सर्वेक्षण जातलें. सर्वेक्षण एका म्हयन्यांत पुराय करपाचें उद्दिश्ट आसलें तरी अतिक्रमणांचो आंकडो वाडलो जाल्यार चड काळ लागपाची शक्यताय आसा. लोकांचो आदार मेळ्ळो जाल्यार सर्वेक्षण बेगीन जातलें, ना जाल्यार उशीर लागतलो, अशें सर्वेक्षण संचालक जॉन्सन फर्नांडीस हांणी सांगलें.
सर्वेक्षण संचालनालयान सर्वेक्षणाचो पंगड तयार केला. उत्तर गोंय कोमुनिदाद प्रशासक, सेरूला कोमुनिदाद तशेंच पुलिसांकूय म्हायती दिल्या. सर्वेक्षणा खातीर कोमुनिदाद, कोमुनिदाद प्रशासक तशेंच पुलिसांची मजत घेवची पडटली. अतिक्रमणांचें सर्वेक्षण जावपी सेरूला कोमुनिदाद ही पयली कोमुनिदाद आसा. हाचे पयलीं कोमुनिदादींतल्या कांय थारावीक अतिक्रमणांचें सर्वेक्षण जालां, जमनींचें जालां. एके कोमुनिदादींतल्या पुराय अतिक्रमणांचें सर्वेक्षण जावंक नासलें. खंडपिठाच्या आदेशाक लागून तें जाता, अशें सर्वेक्षण संचालक जॉन्सन फर्नांडीस हांणी सांगलें.
सेरूला कोमुनिदादीन खूब जाणांक प्लॉट दिल्यात. घरा बांदून खूब जाणांनी अतिक्रमणां केल्यात. सर्वेक्षणा उपरांत अतिक्रमणांची म्हायती कोमुनिदादीक उपलब्ध जातली, अशें सेरूला कोमुनिदादीचे अॅटर्नी पीटर मार्टीन हांणी सांगलें.
आयज सर्वेक्षण करपी पंगडा कडेन चर्चा करून सर्वेक्षणाची कार्यावळ थारतली. कोमुनिदाद जमीन वाठारा प्रमाण सर्वेक्षण जातलें. दोंगराळ वाठारांतल्या सर्वेक्षणाक उशीर लागतलो. लोकांनी आदार केलो ना, जाल्यार पुलीस बळाचो वापर जातलो, अशें अॅटर्नी पीटर मार्टीन हांणी सांगलें.
सर्वेक्षण खात्याच्या म्हापशें कार्यालयांतले शुभम गांवस, सुरज लोटलीकार, दत्ताराम मांद्रेंकार आनी विवेक बुडे हांचो पंगड सर्वेक्षण करतलो. येरादारीची वेवस्था उत्तर गोंय कोमुनिदाद प्रशासकांक करची पडटली. कोमुनिदादींतलीं बेकायदो घरां तशेंच अतिक्रमणांचेर कारवाय चालू आसा. न्यायालयाच्या आदेशा उपरांत ही कारवाय जाल्या. काय घरां लेगीत संकश्टांत आयल्यात. कोमुनिदादींतलीं घरां कायदेशीर करपाची मागणी वाडत आसा. कोमुनिदादींतलीं खूबशीं बेकायदो घरा गोंयकारांचीं आसात. हीं घरां कायदेशीर करपाची घोशणा मुख्यमंत्री डॉ. प्रमोद सावंत हांणी केल्या. घरा खातीर जितली जमीन दिल्ली, ताचे भायर खूब जाणांनी अतिक्रमण केलां.
अतिक्रमणांची म्हायती नाः जॉन्सन फर्नांडीस
कोमुनिदादींनी कितलीं बेकायदो घरां आसात, ताची म्हायती कोमुनिदादीं कडेन ना. अतिक्रमणांची लेगीत म्हायती ना. खूबश्या कोमुनिदादींनी अतिक्रमणांचें सर्वेक्षण करपाची मागणी प्रशासकां कडेन केल्या. अजून हे मागणेचेर कसलोच निर्णय जावंक ना. एके याचिके संदर्भात अतिक्रमणांचें सर्वेक्षण करपाचो आदेश खंडपिठान सेरूला कोमुनिदादीक दिला. ह्या आदेशाक लागून सर्वेक्षण जाता. हेर कोमुनिदादींतल्या सर्वेक्षणा विशीं सरकारा कडल्यान कसलोच आदेश ना, अशें सर्वेक्षण संचालक जॉन्सन फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
