सेमिफायनलींत भाजपाचें जैत

भांगरभूंय | प्रतिनिधी

विधानसभा आनी लोकसभे खातीर लोक मतदान करतात, तेन्ना तांचें प्राधान्यक्रम वेगळेवेगळे आसता. राज्यांतले प्रस्न वेगळे आनी देशांतले वेगळे. तरीय लोकसभा वेंचणुके पयलीं विधानसभांचो निकाल लागता ताका कांय बाबतींत ‘लोकसभे खातीरची सेमिफायनल’ म्हणूं येता. कारण स म्हयने तें वातावरण तिगलें जाल्यार त्या राज्यांत सत्तेर आयिल्ल्या पक्षाच्याच लोकसभा उमेदवारांक जैत मेळटा. अर्थांत तशें जाताच अशें ना. देखून भारतीय वेंचणुकांक जायते जाण चमत्कार म्हणटात!! काल मध्य प्रदेश, छत्तीसगढ, राजस्थान आनी तेलंगण राज्यांच्या विधानसभा वेंचणुकांचे निकाल लागले. पयल्या तीन कडेन भाजपान जैत जोडलें. तर तेलंगणच्या मतदारांनी काँग्रेसीक हात दिलो. राजस्थानांत भाजपाक 114 तर काँग्रेसीक 67 जागे मेळ्ळ्यात. मध्य प्रदेशांत भाजपाक 116 तर काँग्रेसीक 35 जागे मेळ्ळ्यात. ते अनुक्रमान 164 आनी 65 मेरेन वचूं येतात. छत्तीसगढांत भाजपाक 54 आनी काँग्रेसीक 35 मेळटले. तेलंगणांत दोन खेपे सत्तेर आशिल्ल्या बीआरएस पक्षाक 39 तर काँग्रेसीक मेळटले. रातीं उसरां मेरेन मतमेजणी चलताली. ह्या निकालान भाजपाक लोकसभा वेंचणुकेक आनीक उमेदीन मुखार वचपाचें बळगें दिलां, तर फक्त तीन राज्यांनी सत्ता आशिल्ल्या काँग्रेसीच्या वाट्याक निरशेणी दिल्या.
भाजपाच्या मुख्यालयांत काल सांजवेळा हजारांनी वावुरप्यां वांगडा खोस मनयतना, प्रधानमंत्री नरेंद्र मोदी हांणी वावुरप्यांचे उपकार मानल्यात. ‘जातीचेर देशाचें विभाजन करपाक सोदपी पक्षांक ह्या निकालान धडो शिकयला. हें इतिहासीक जैत. आयज सबका साथ सबका विकास जिखला. विकसीत भारता खातीर केल्लें आवाहन जिखलां. आत्मनिर्भर भारताच्या संकल्पाक जैत मेळ्ळां. दुबळ्यांचो विचार, प्रामाणीकपण, बरें प्रशासन जिखलां’, अशें तांणी सांगलें. दुसरे वटेन ‘जनादेश आमी नमळायेन स्विकारता. विचारांची लढाय चालूच उरतली. लोकांचें स्वताचें तेलंगण करपाचो आमचो यत्न आसतलो’, अशें काँग्रेसीच्या राहूल गांधीन म्हणलां. कांय कडेन एकमेकांक नांवां दवरपाचे थोड्या फुडाऱ्यांचें यत्न सुरू जाल्यात. कांय कडेन वावुरप्यां मदीं चकमकीय जाल्यात. नवें राजकारण खूब लवचीक जालां. एका पक्षांतलो फुडारी सहज दुसऱ्या पक्षांत वता, परत पोरण्यां पक्षांत येता. तेन्ना वावुरप्यांनी ताचे प्रमाण विशाल दृश्टीकोनाचे जावचें. हार-जीत ही जायत आसता. हारीन निराश जावेंच न्हय, जैत तकलेक मारून घेवचें न्हय.
भाजप आनी काँग्रेसीक जैता खातीर परबीं. मध्य प्रदेश सोडल्यार हेर कडेन नवीं सरकारां येतलीं, तांणी आतां उदरगत आनी एकचाराचेर लक्ष केंद्रीत करपाक जाय. भाजपान तेलंगणाचेर चड लक्ष दिवपाचो निर्णय घेतला. काँग्रेसीनूय आत्मपरिक्षण करपाक फावो. छत्तीसगढ, राजस्थानांत ते कित्याक हारले. मध्य प्रदेशात ते दोन फावटी सत्तेर आशिल्ल्या भाजपाक झुटये वयल्यान कित्याक देंवोवंक शकले नात, हाचो तांणी अभ्यास करचो. तेलंगण उदरगतीचे बाबतींत मुखार आशिल्लें. थंयच्या सरकाराकूय आपलें नेमकें कितें चुकलें, ताचो अभ्यास करचो पडटलो. पूण हें करतना राज्य, देश आनी लोकांचो विचार करप म्हत्वाचो. आमचो देश संवसारांतलो सगल्यांत व्हडलो लोकशाय देश. सगले लोक आमची तुस्त करतात. आमचे लोकशायेक खंयचेच परिस्थितींत बादा येतली, अशें कृत्य आमच्या हातांतल्यान जावंक उपकारना. लोकशायेंत लोक म्हत्वाचे. तांणी दिल्लो निकालूय प्रत्येकान मानून घेवंक जाय.
काँग्रेस आनी हेर पक्षांनी इंडिया ही आघाडी स्थापन केल्या. तिची खरी परिक्षा आतां फुडल्या स म्हयन्यांच्या काळांत लागतली. कारण भोवतेक राज्यांनी भाजपा सत्तेर आसा. तांची संघटनात्मक बांदावळ, तिचें कार्य संवसारांत हेर कडेन पळोवपाक मेळना. काँग्रेसीचे बाबतींत तशें ना. इंडियांत एकजूट येवप कठिणूच दिसता. ती आयलीय जाल्यार प्रधानमंत्री कोणे जावचें ह्या प्रस्नाचेर तिका वेरो वचूं येतात. 1970 च्या उत्तरार्धांत जनता पार्टी स्थापन जाली, सत्तेरुय आयली, पूण अडेज वर्सांत फुटली. निदान ह्या निकाला उपरांत इंडिया आघाडेच्या फुडाऱ्यांनी शांत चित्तान विचार करून पावलां उखलचीं पडटलीं.
भाजपाच्या जैताचेर प्रतिक्रिया दितना प्रधानमंत्री मोदी हांणी एक सुंदर प्रतिक्रिया दिली. ‘देशांत चार जातीच म्हत्वाच्यो. त्यो सशक्त केल्यारूच देश सशक्त जातलो. त्यो जाती म्हणल्यार स्त्रीशक्त, युवा शक्त, शेतकामती आनी गरीब कुटुंबां’. ते नदरेन ते यत्न करतात. मात तांकां सगल्यांची साथ मेळप गरजेचें. हो आपलो, तो परको अशें करून उपकारचें ना. कारण 140 कोटींचो आमचो देश हो लोकसंख्येचे नदरेन संवसारांतलो सगल्यांत व्हडलो देश. प्रत्येक नागरिकाच्या साह्यान ताची उदरगत करपाची आसा, तो वयर काडपाचो आसा…. आनी आमी तातूंत एक दीस येशस्वी जातलेच!!