सेना पदक मेळिल्ले कर्नल अमित परब

भांगरभूंय | प्रतिनिधी

लेफ्टनंट म्हणून प्रशिक्षण पुराय जातकच तांकां 1 सप्टेंबर 2001 दिसा राजपूत रेजिमेंटाच्या 27 व्या बटालियनांत नेमले.

सलाम फौजी

गोंयचे लश्करी अधिकारी कर्नल अमित आनंद परब हांकां जम्मू- काश्मीरांतल्या पुलवामा जिल्ह्यांत तांच्या आदर्श धैर्य आनी शौर्या खातीर भोवमान मेळ्ळा. हो अधिकारी भारत- पाकिस्तान शिमेचेर ऑपरेशन पराकराम, भारत- चीन शिमेचेर ऑपरेशन फाल्कन हांचो भाग आशिल्लो आनी जम्मू-काश्मीरांतल्या बंडखोरी विरोधी कारवायांनी सक्रीयपणान वांटो घेतालो, थंय ताणें स यशस्वी कारवायांनी 18 कट्टर आतंकवाद्यांक मारले. अशाच एका कारवायांत तोय जखमी जालो पूण आतंकवादी काबार जायसर तो झुजत रावलो. ताका ताच्या आदर्श धैर्य, शौर्य, निर्भयपण आनी जिद्द हांचे खातीर सेना पदक फावो जालें.

कर्नल परब डेहराडूनाच्या प्रतिश्ठीत भारतीय लश्करी अकादेमींत प्रशिक्षक आशिल्ले. भारत-म्यांनमार शिमेचेर मणिपूरांत बंडखोरी विरोधी कारवायेचेर नियंत्रण दवरपाक ते सक्रीयपणान वावुरले. कर्नल परब हे राजपूत रेजिमेंटल सेंटरांत प्रशिक्षणांत जनरल स्टाफ ऑफिसर आशिल्ले.  तांणी तमिळनाडूंतल्या वेलिंग्टनच्या प्रतिश्ठीत संरक्षण सेवा कर्मचाऱ्यांचो अभ्यासक्रम (डीएसएससी) पास केला.

तरणाटो अधिकारी म्हणून कर्नल परब इथिओपिया आनी इरिट्रियाच्या संयुक्त राश्ट्रांच्या शांतताय राखण दळाचे भाग आशिल्ले आनी थंय तांकां सैन्य सेनापतीचें तोखणाय कार्ड फावो जालें. कर्नल पदाचेर बडटी मेळ्ळ्या उपरांत तांणी डोकलाम संकश्टाच्या काळांत भारत-चीन शिमेचेर नथुलांत (सिक्किम) आपले बटालियन 27 राजपूताचें फुडारपण करून आपलो जापसालदारकेचो वाठार चड जतनायेन राखलो.

अरुणाचल प्रदेशांतल्या हुंवारांतल्यान मदत करपा खातीर व्हायस चीफ ऑफ लश्करी कर्मचाऱ्यांचें तोखणाय कार्ड आनी भारत-चीन शिमेचेर कार्यावळी खातीर जनरल ऑफिसर कमांडिंग कमॅंडेशन कार्ड ह्या अधिकाऱ्याक फावो जालां . संरक्षण दळां खातीर रणनितीच्या वावराचे प्रभारी अधिकारी म्हणून उत्तर प्रदेशांतल्या बरेलींत अग्निवीर भरती करपा खातीर लश्करी भरती संघटनेंत भरती संचालक म्हणूनय तांची नेमणूक जाल्ली.

कर्नल परब हांणी दिवचलेच्या अवर लेडी ऑफ ग्रेस हायस्कुलांत आनी म्हापशेच्या ज्ञानप्रसारक मंडळ महाविद्यालयांत शिक्षण घेतलां. आतां मेरेनच्या लश्करी कारकिर्दींत तांची जायत्यो कमांड, स्टाफ आनी प्रशिक्षण नेमणूक जाल्या. लेफ्टनंट म्हणून प्रशिक्षण पुराय जातकच तांकां 1 सप्टेंबर 2001 दिसा राजपूत रेजिमेंटाच्या 27 व्या बटालियनांत नेमले.

एनसीसी कॅडेट म्हूण तांणी शाळा आनी कॉलेजींतल्या शिक्षणांत कर्नाटक आनी गोंय एनसीसी संचालनालयांचें प्रतिनिधित्व केलें आनी युवा विनिमय कार्यावळीचो (वायईपी) एक भाग म्हूण नेपाळांत भारतीय एनसीसी प्रतिनिधी म्हूण तांची निवड जाली. ह्या अधिकाऱ्याचें लग्न वेवसायान शिक्षक आशिलल्या रचना हिचे कडेन जालां आनी तांकां राष्ट्रीय हवाई पिस्तूल शूटर अतिक्ष आनी राज्य पांवड्यावेलो हवाई पिस्तूल शूटर अनवे हीं दोन भुरगीं आसात.