भांगरभूंय | प्रतिनिधी
पणजी : फाटले चार दीस जाले सेगीत पडपी पावसाक लागून जून म्हयन्याचे निमाणे कडेन आशिल्ली 11 टक्के तूट निमाणी पावसान भरून काडली. राज्यांतल्या सरासरी पावसाचें प्रमाण 4 टक्के चड आसा. आयताराय राज्यांत सगल्याक पावस झडिल्लयन आतां मेरेन 46.14 इंच (1172 मीमी) पावस जाला. पणजी वेधशाळेन 6 ते 12 जुलय मेरेन येलो अलर्ट जारी केला.हाका लागून येवपी सप्तकभर मध्यम प्रमाणांत पावस झडटलो. फाटल्या 24 वरांनी 1.66 इंच पावसाची नोंद जाल्या.
आयतारा पावसाचे सरीक लागून रस्त्यार उदक सांठपा सयत अदींमदीं लायटूय नासताली. मात पावस अदीं-मदीं विसव घेतालो. तशेंच वार्याचो वेगूय मर्यादीत आशिल्लो. हाका लागून झाडां पडटालीं. अंदूं मॉन्सून बेगीन सुरू जालो. जुनाचे सुरवातेकूच पावसान हाजेरी लायली. उपरांत मात ताचो वेग उणो जालो. हाका लागून जुनांत पावसाचें प्रमाण सरासरी परस उणें आसलें. जुलय सुरू जातांच पावसाचो नेट वाडलो. 3 जुलयाक 6.33 इंच पावसाची नोंद जाली. वेधशाळेन ऑरेंज अलर्ट दिल्ल्यान शिक्षण खात्यान शुक्रारा शाळा, विद्यालयांक सुटीय दिली.
धारबांदोड्या वाठारांत सगल्यांत चड म्हळ्यार आतां मेरेन 70.31 इंच (1786मीमी) पावसाची नोंद जाल्या. दरवर्सा सांखळे, वाळपय वाठारांत सगल्यांत चड पावस पडटा. अंदूं मात धारबांदोडा आनी सांग्यार पावस चड पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
