भांगरभूंय | प्रतिनिधी
लैंगीक तस्करी संबंदी परिशदेचे उक्तावण
पणजी ः लैंगीक तस्करीची (सेक्स ट्रॅफिकिंग) समस्या फकत गोंय पुरती मर्यादीत ना. लैंगीक तस्करीक आळाबंदा हाडपा खातीर तपास यंत्रणे सयत राज्यांतर्गत सहकार्याची गरज आसा. ते खातीर लैंगीक अत्याचारा आड वावुरपी आंतरराष्ट्रीय संघटनांचीय मजत लागतली अशें मुख्यमंत्री डॉ. प्रमोद सावंत हांणी म्हणलें.
पणजेत ‘अर्ज’ आनी महिला आयोगान आयोजीत केल्ले लैंगीक तस्करी संबंदी परिशदेचे उक्तावण डॉ. सावंत हांणी केलें. ह्या वेळार ‘अर्ज’चे संचालक अरुण पांडे, बायलां आयोगाची अध्यक्ष रंजीता पै आनी हेर मानेस्त हाजीर आशिल्ले.
गोंयांत लैंगीक अत्याचार वा बायलां आड जावपी हिंसाचार सोंसचे नात. बायलां पुलीस स्टेशना वांगडा पिंक फोर्स स्थापन केला. पुलीस स्टेशनांनी बायलां पुलीसांची नेमणूक करपा वांगडाच वेगवेगळ्या सुवातींनी जागृताय कार्यावळी आयोजीत करतात. कांय दुर्दैवी बायलो लैंगीक तस्करीच्यो बळी जातात. अशा बायलांक राखण दिवपा सयत गोंयांत लैंगीक तस्करीतल्या गुन्यांवकारांक गोंयांत सुवात ना अशें डाॅ. सावंत हांणी सांगलें.
बायलां मान दिवप ही गोंयची परंपरा. गोंय हें संवसारांतलें एक उत्कृश्ट पर्यटन थळ जावन आसा. गोंयांत पर्यटक मजा करपाक येतात. पर्यटन उद्देगाचे कांय दुश्परिणाम जातात. सेक्स ट्राफ्रीकींग ही पर्यटन उद्देगाकडेन संबंदीत आशिल्ली एक समस्या. लैंगीक वेव्हारा संबंदीत गुन्यांव गोंयांत नोंद जातात वा कांय जाणांक गोंयांत धरतात तरी तांचो उगम गोंयांतल्यान जायना. सेक्स ट्राफिकींगाची समस्या राज्यांतर्गत आसा. सेक्स ट्राफिकींगची सुरवात परदेशांतल्यान जावपाची चड शक्यताय आसा. हे खातीर ही समस्याक सुटावी करपाक राज्यांतर्गत सहकार्या वांगडाच आंतरराष्ट्रीय संघटनांची मजत घेवची पडटली. ह्या परिशदेंत वेगवेगळ्या विशयांचेर चर्चा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
