भांगरभूंय | प्रतिनिधी
सेंद्रीय सारें, बायोगॅसा खातीर 75 ते 90 टक्के अनुदान
भांगरभूंय | प्रतिनिधी
पणजी : राज्य सरकारान सेंद्रीय शेताक उर्बा दिवचे खातीर आनीक एक पावल उबारलां. शेतकी खात्यान शेतकारां खातीर नवी येवजण चालीक लायल्या. हे प्रमाण शेतांतलो सेंद्रीय कोयर आनी शेणा पसून सेंद्रीय सारें तयार करप, गायंडोळ सारें करप (व्हर्मी कंपोस्ट), बायो गॅस प्लाँट बसोवप अश्या जायत्या गजालीं खातीर 75 ते 90 टक्के अनुदान दितले. तशेंच मातयेचो दर्जो सुदारपी कंडिशनर तशेंच पिकां खातीर गरजेचें आशिल्लें सुक्ष्म अन्नद्रव्यां विकत घेवचे खातीरूय मजत करतले.
खात्यान जारी केल्ले अधिसुचवणे प्रमाण, बायोगॅस प्रकल्प बसोवपा खातीर शेतकारांक 90 टक्के अनुदान दितले. बायोगॅस प्रकल्पाचो आकार आनी तांकी प्रमाण 27 हजार ते 1 लाख रुपयां मेरेन अनुदान दितले. बायोगॅस प्रकल्प बसोवपा खातीर शेतकारांक उर्बा दिवपी शेतकी अधिकार्यांक, शेतकी इश्टांक दरेका प्रकल्पा फाटल्यान 1500 रुपया दितले. शेतकारांक तांचे कडेन आशिल्ल्या गोरवांच्या आंकड्या प्रमाण बायोगॅस प्रकल्प बांदतले.
बायोगॅस प्रकल्प बांदले उपरांत फुडलीं स वर्सां जतनाय, दुरुस्ती खर्चाच्या 20 टक्के रक्कम शेतकारांक दितले. जैवीक सारें करपी युनीट बसोवपा खातीर शेतकारांक वट्ट खर्चाच्या 75 टक्के अनुदान दितले. अनुदान प्रती घन मिटर चडांत चड 1950 रुपया आसतलें. गायंडोळ करपाच्या युनिटाकूय 75 टक्के अनुदान दितले. वयले दोनूय युनीट पुराय जाले उपरांतूच शेतकारांक अनुदान मेळटलें. इत्सूक शेतकारांनी विभागीय शेतकी अधिकार्यां कडेन शेतकी कार्ड, माती भलायकी कार्ड आनी हेर कागदपत्रां सयत अर्ज करप गरजेचें आसा.
शेतकी मळार काम करपी आनी कृषी कार्ड आसपी खाजगी लिमिटेड कंपन्यो, संस्थांकूय ही येवजण लागू आसतली. मातयेचो दर्जो सुदारपी कंडिशनर विकत घेवपा खातीर शेतकारांक दर हॅक्टर चडांत चड 6 हजार रुपया दितले. एका शेतकाराक चडांत चड चार हॅक्टर मेरेन मजत दितले. जाल्यार सुक्ष्म अन्नद्रव्यां विकत घेवपी शेतकारांक दर हॅक्टर फाटल्यान 7500 रुपया दितले अशें अधिसुचवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
