भांगरभूंय | प्रतिनिधी
आग्नेल बार्रेटो : सेंद्रीय उत्पादनांक चड दर मेळपाक जाय
भांगरभूंय । प्रतिनिधी
पणजी : सध्या संवसारभर सेंद्रीय शेतकी उत्पादनांची मागणी वाडत आसा. गोंयांतलें 80 ते 90 टक्के काजू उत्पादन सेंद्रीय पद्दतीन जाता. हातूंत कसलेंच रसायन वापरिनात. उत्पादकांनी हे संदीचो फायदो करून घेवचो, असो उलो सेंद्रीय काजू उत्पादक आग्नेल बार्रेटो हांणी मारला. शेनवारा काजू महोत्सवांत जाल्ल्या तंत्रीक चर्चासत्रांत ते उलयताले. ह्या वेळार शास्त्रज्ञ डॉ. ए आर देसाय, काजू उत्पादक विंदेश शिरोडकार, गोवा शेतकी महाविद्यालयाचे प्राचार्य डॉ. सुरेश कुंकळकार हाजीर आशिल्लें.
फाटल्या कांय वर्सांत संवसारभर कॅन्सरा सारकिल्लीं असंससर्गजन्य दुयेंसां वाडत आसात. पिकांत रसायनीक साऱ्यांचो चड वापर जाल्ल्यान अशें जावं येता. निरोगी जिणे पद्दतीक आनी पोशक अन्नधान्याक संवसारभर प्राधान्य दितात. गोंयांतल्या सेंद्रीय काजू शेतकारांनी हाचो लाव घेवचो. तांणी आपल्या सेंद्रीय काजूचें योग्य पद्दतीन मार्केटींग केल्यार तांकां अर्थीक फायदो मेळटलो. कांय वर्सां आदीं हांवें तण काडपाक रसायनीक वखदांचो वापर केल्लो. पूण हाका लागून म्हाका लुकसाण चड जालें, अशें बार्रेटो हांणी सांगलें.
रसायनां वापरल्या उपरांत तण गेलें, पूण कांय वर्सांनी काजूचें उत्पादन 60 टक्क्यांनी उणें जालें. तशेंच काजू वांगडा नाल्लाकूय कीड लागली. हाचे उपरांत रसायनांचो वापर पुरायपणान बंद केलो. ही जमीन परतून सेंद्रीय जावपाक पांच ते आठ वर्सां लागलीं. काजींचे भोंवतणचें तण काडपाची प्रक्रिया जरी वेळ घेवपी आसली तरी रसायनां केन्नाच वापरूंक फावना असो धडो हांवें शिकलां. तशेंच सरकारान सेंद्रीय शेती कडेन वचपा खातीर धोरणां तयार करचीं. सेंद्रीय उत्पादनांक चड दर मेळपाक जाय. तेन्नाच तरणाटी पिळगी ह्या क्षेत्रांत येतली अशेंय तांणी सांगलें.
डॉ. सुरेश कुंकळकार हांणी सांगलें, फुडाराक सेंद्रीय काजू शेतीक व्हड मागणी आसतली. गोंयांतल्या शेतकारांनी योग्य नियोजन केल्यार तांकां फायदो जातलो. मल, जनावरांचे मलमूत्र आदी सगल्यांचो उपेग सारें म्हणून करूं येता. गोंयच्या काजूची रूच वेगळी आनी बरी आसा. ही खाशेली चव सेंद्रीय पद्दतींचो उपेग करून तिगोवन दवरु येता. अशें पद्दतीचे शेतीक खर्चूय उणो जाता. अशीं उत्पादनांनी चड पोशकद्रव्य आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
