भांगरभूंय | प्रतिनिधी
पणजी: सेंट जोसेफ वाज कॉलेजीच्या शरिरीक शिक्षण आनी खेळां खात्यान आनी सेंट जोसेफ वाज इन्स्टिट्यूट ऑफ एज्युकेशना वतीन शिक्षणीक वर्स 2022-23 च्या विद्यार्थ्यां आनी कर्मचार्यां खातीर ‘भलायकेन भरिल्ली जिणे पद्दत चालीक लावप’ ह्या विशयाचेर व्याख्यान दवरिल्लें.
ह्या वेळार भलायके संबंदीत वेगवेगळ्या विशयांचेर वट्ट 5 व्याख्यानां घडोवन हाडलीं. पयलें व्याख्यान ‘प्राणायम आनी ध्यान’ ह्या विशयाचेर आशिल्लें. हाचेर डॉन बॉस्को कॉलेज पणजेचे शारिरीक शिक्षणाचे सहाय्यक प्राध्यापक सचीन पार्सेकार हांणी मार्गदर्शन केलें. आपल्या व्याख्यानांत सचीन हांणी विवीध तरेचें प्राणायाम उलयले करून दायलें. तशेंच ताणी ध्यान करप कितले म्हत्वाचें हाचेर भर दिली.
दुसर्या व्याख्यानांत डॉ. दिक्षा अर्लेकार हे ‘वेवसायांत होमियोपॅथीक दोतोर आनी कॉमन योग प्रोटोकॉलाचेर’ उलयले. डॉ दिक्षान आपल्या व्याख्यानांत ‘एकंदरीत योग, योग्य जेवण, सात्वीक आहार, प्राणायम, विवीध तरेचें आसन, ताण सोंपपाक योगाचें म्हत्व आनी ध्यान हांचेर भर दिली. तिसरें व्याख्यान दामोदर महाविद्यालय मडगांवचे शरिरीक शिक्षण आनी खेळां म्हाविद्यालय संचालक डॉ. अजिंक्य कुडतरकार हांणी दिलें. पोशण आनी समतोल आहाराचें म्हत्व आनी दोनूय सारकेच पूण वेगवेगळ्या विशयांचेर भर दिवपाचेर कुडतारकार हांणी दिली.
डॉन बॉस्को कॉलेज पणजेचे शारिरीक शिक्षणाचे सहाय्यक प्राध्यापक डॉ. अजीत गोपी हांणी ‘ताण घाम काडून उडोवप: व्यायाम आनी ताण हांचे मदलो एक आश्चर्यकारक दुवो’ ह्या विशयाचेर दिल्ल्या व्याख्यानांत भारत इतल्या दुयेंसां कडेन कसो झगडटा आनी ताचें मुखेल कारण म्हळ्यार ताण आसा. ताण पयस करून बरी न्हीद आनी भलायकेक बरी संवय पाळप गरजेचें अशी म्हायती तांणी दिली.
रस्त्याच्या अपघातांत पयली मदत ह्या विशयाचेर पीएचसी कुट्टाळे आनी जीएमसी बांबोळेची आदली वैजकी अधिकारी डॉ. नोएला कोरेया हांणी निमाणें व्याख्यान दिलें. डॉ. नोएलान पयल्या उपचारांत डीआरएस एबीसी विशीं उलयलें जें म्हणल्यार धोको, प्रतिसाद, मदती खातीर धाडप, वायुमार्ग, श्वास, सीपीआर हाचेर आशिल्लें. विद्यार्थ्यांक आनी कर्मचार्यां कडेन आशिल्ल्या सगळ्या प्रस्नांक जाप दिवन डॉ. नोएला हांणी सत्र सोंपयलें. पयली मदत वेळार आनी योग्य रितीन केल्यार जायत्या जाणांचो जीव वाटावंक मेळटा अशें तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
