भांगरभूंय | प्रतिनिधी
वरा भितर सीसीटीव्हीच्या आदारान पुलिसांनी केली कारवाय
भांगरभूंय । प्रतिनिधी
वास्को : नवे वाडे वाठारांतल्या सेंट अँथनी कपेलांतले मुर्तीची मोडतोड केल्ल्या प्रकरणआंत तशेंच थंयचे फंडपेटयेंतली रकम चोरिल्ल्या प्रकरणांत वास्को पुलिसांनी नवनीत सिंग (30) हाका बुधवारा अटक केली. मध्यानरातीर चोरी करतना तो अर्धनग्न आशिल्लो. ताचे फाटलें कारण स्पश्ट जावंक ना. ताका मानसीक विकृती आसा काय कितें हाचो सोद वास्को पुलीस घेतात.
कागाळ दाखल जाले उपरांत फक्त वरा भितर सीसीटीव्हीच्या आदारान वास्को पुलिसांनी दुबाविताक अटक केल्ल्यान थंयची शांतताय इबाडूंक ना.
सेंट अँथनी कपेलांतले मुर्तीची मोडतोड जाल्ल्याचें तशेंच फंडपेटयेंतली रकम ना जाल्ल्याचें बुधवारा सकाळीं त्या कपेलांत आयिल्ले एके व्यक्तीक दिसलें. ताणें ती म्हायती हेरांक दिताच थंय फक्त कांय मिणटां भितर लोक व्हड संख्येन जमले. ह्या प्रकरणांत वास्को पुलिसांक म्हायती मेळटाच पुलीस ताकतिकेन घडणुकेचे सुवातेर पावले. तांणी तपासकामाक सुरवात करतना थंयच्या सीसीटीव्ही फुटेजींत कितें मेळटा काय म्हूण सुरवात केली. तेन्ना त्या कपेला मुखार लायिल्ल्या सीसीटीव्हीचे फुटेजींत एक व्यक्ती कपेलांत वतना दिसली. ती व्यक्ती मोबायलाचेर उलयत एका दोन माळ्यांचे इमारतीचीं सोंपाणां चडटना दुसऱ्या सीसीटीव्ही फुटेजींत दिसली. ह्या प्रकरणांत ते इमारतीचे कुडींत रावप्याक राती वेळार भोंवपी व्यक्तीचे व्हिडियो दाखयले, तेन्ना ताणें ती व्यक्ती कामाक गेल्ल्याचें सांगलें. ते उपरांत तो काम करताले थंय संपर्क करून म्हायती दिली आनी सगळे सोपस्कार केले उपरांत पुलिसांनी ताका ताब्यांत घेतलो.
मंगळार आशिल्ल्यान सेंट अँथनी कपेलांत भावीक व्हड प्रमाणांत दर्शन घेवपाक आयिल्ले. ते उपरांत मध्यानरातीर नवनीत सिंग हाणें त्या कपेलांत प्रवेश करून थंयचे मुर्तीची मोडतोड केली आनी फंडपेटी फोडली.
नवनीत सिंग हाचें लग्न जालां. कांय दिसा आदीं ताणें आपले घरकान्नीक आनी भुरग्यांक गांवाक धाडिल्ले. सध्या तो इश्टां वांगडा नवेवाडे वाठारांतल्या बिराडाक रावतालो. कपेलांत वच्चे आदीं तो थंयच्या एक- दोन घरां भोंवतणी घुटमळटालो. कपेलांत मोडतोड करपाची घडणूक घडिल्ल्याची कळटाच थळावे नगरसेवक सुदेश भोसले आनी नवे वाडेचे नगरसेवक विनोद किनळेकार हे रोखड्या रोखडे घडणुकेचे सुवातेर आयले. तांणी पुलिसांनी केल्ल्या तपास वावराचें कवतूक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
