भांगरभूंय | प्रतिनिधी
आयपीएल 2023चे मिनी पावणेंत विदेशी खेळगड्यांचेर पयश्यांचो पावस पडलो. इंग्लंडाच्या सॅम करना खातीर पंजाब किंग्सान 18.50 कोटी रुपयांची बोली लायली.आयपीएलाच्या इतिहासांत ही आतां मेरेनची सर्वोच्च बोली थारली. करना वांगडाच इंग्लंडाच्या बेन स्टोक्स (16.25 कोटी) आनी हॅरी ब्रुक (13.25) हांकां लेगीत बरें मोल मेळ्ळें. जाल्यार मुंबय इंडियन्सान कॅमरून ग्रीनाचेर 17.50 कोटी रुपया मोडले.
हे पावणेंत विदेशी खेळगडे विशेश करून संवसारीक टी-20 चॅम्पीयन इंग्लंडाच्या खेळगड्यांनी शेक दवरलो. भारताच्या फ्रॅंचायजींनी भारताच्या खेळगड्यां कडेन तशें पळोवपाक गेल्यार आडनदर केली. तरी आसतना शिवम मावी आनी मुकेश कुमार हांणी आपलो ठसो उमठयलो. गुजरात टायटन्सान 6 कोटी मोडून शिवम मावीक विकतो घेतलो. जाल्यार मुकेश कुमारा खातीर दिल्ली कॅपिटल्सान 5.5 कोटी रुपयांची बोली लायली. भारता वतीन हे ‘टॉप गेनर’ थारले.
कांय अनकॅप्ड खेळगडे लेगीत करोडपती जाले. झिम्बाब्वेच्या सिकंदर रजा, नामिबियाच्या डॅव्हीड विसे आनी आयर्लेण्डाच्या जोशुआ लिटल हांणी सगल्यांक अजाप भरीत केले. कालचे आयपीएल पावणेंत 29 विदेशी खेळगड्यां सयत 80 जाणां कडेन कबलात केली आनी ते खातीर फ्रॅंचायजींनी वट्ट 167 कोटी रुपयांचो धूप केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
