भांगरभूंय | प्रतिनिधी
रसिकांचे आभार मानपी आनी आपल्या सहकलाकारांची मानान वळख करून दिवपी संजिवनी आवाजा वांगडाच तिचें दर रूप ओडलायणें, तिचें गाणें आनंदाचें, शालीनतायेचें.
कला अकादमींत हालींच संजिवनी भेलांडे हे गायिकेची कार्यावळ पळोवपाची संद मेळ्ळी. आशा वेलींगकार आनी निलेश फातर्पेंकार हांच्या मुखेलपणा खाला आरंभ संस्थेन सादर केल्ली ही कार्यावळ मनाक एक आगळीवेगळी अशी थाकाय दिवन गेली.
हांसतें मुखामळ, प्रसन्न व्यक्तीमत्वाच्यो संजिवनी. केन्ना तांणी आपलेे शुद्ध वाणयेन मेहफिलीचो शुभारंभ केलो आनी तीन वरां कशीं केलीं हें कळ्ळें लेगीत ना. प्रत्येक गिता वांगडा त्या गिताची फाटभूंय सांगपाची तिची शैली निश्णात निवेदकाचीच आनी म्हणुनूच काय किदें ती म्हाका म्हजीच सहकारी दिसली. गीतकार संगीतकार गावपी कलाकार वांगडाच तें गीत चित्रीत जाल्ल्या वाठाराची माहिती तिचे अभ्यासपूर्ण शैलेची वळख करून दिवपी आशिल्ली.
पंडीत नरेंद्र शर्मा हांचे लिखणेंतल्यान साकारिल्लें ज्योती कलश छलके गितान आरंभ करतना आइए गोवा की गर्मी से दूर चलें उत्तराखंड की ठंडी हवा में म्हणपी कलाकार प्रेम पर्वत फिल्मांतलें ‘ये दिल और उनकी निगाहें’ गितान हलकें फुलकें वातावरण तांणी निर्मिलें. परख फिल्मांतलें ‘ओ सजना बरखा बहार आयी’ हें गीत गावचे पयलीं मूळ बंगाली रचना गावपाच्या तांच्या सादरीकरणाक रसिकांनी उपाट प्रतिसाद दिलो.
गायड, वक्त, अनपढ, दिल अपना और प्रीत परायी अशा फिल्मांतलीं गितां गायत चलचित्र सृश्टीचो सुवर्णकाळ तांणी साकारलो. तर नक्कमा, करीब, लेकिन अशा फिल्मांतलीं गितां गायत तांणी रसिकांक ताल धरूंक लायलो. गायडा असल्या फिल्माचें कथानक सांगतना त्यो नोस्टॅलजीक जाल्यो. जॉंनिसार अख्तर ह्या जेश्ठ गितकाराची वळख करतना फरहानाचो तो आजोबा हें नातें संगीत नवे पिळगेक नातें जोडपाची तांची तरा मनांत घर करून गेली.
महानंदा फिल्मांतलें गीत गायतना आमच्या देशाचे गिरेस्त संस्कृतायेचो नियाळ घेत आमच्या गोंयचे गोड भाशेचो, संस्कृतायेचो उल्लेख करीत मागे उभा मंगेश हें तांणी गायिल्लें गीत प्रसन्न आनी पवित्र वातावरण निर्माण करून गेलें. ल्हानपणांत शाळेंत शिकिल्ली कविता घरा येवन सगल्यांक गावन दाखयतकच जावपी खोशयेचो दिश्टावो तांच्या निकम्मा फिल्मांतलें गीत गायतना आमकां जालो.
आलाप गायत गीत वळखात म्हणून प्रेक्षकांच्या संगीत ज्ञानाचें कौतूक करीत ‘पंख होते तो उड आती रे’ ह्या तांणी गायलेले गतीन कार्यावळ एके वेगळे तेंगशेर व्हेली.
कला आनी संस्कृताय मंत्री गोविंद गावडे हांणी तांचो भोवमान केलो. तांणी तांकां घाल्ली कुणबी शाल संजिवनीन आपल्या उजव्या खांद्यार वेवस्थीत पुराय कार्यावळभर दवरली आनी वांगडा मेळिल्ली कुणबी साडी केन्ना काय न्हेसू अशी जाल्या अशें म्हणपी ही गायिका. तांचीं हींच उतरां तांचे भिरतलें भुरगेपण आमकां दाखोवन गेली.
सुंदर अशी भरजरी साडी न्हेसून गितां गावपी संजिवनी तिचे सुंदर सात्वीक अशे हावभाव केंसांच्या बटां कडेन खेळत उलोवपाची सहज सुंदर प्रभावी अशी शैली, आतां लग्न समयार, वाडदीस जावं हेर कार्यक्रमांच्या वेळार जावपी संगीत कार्यावळीक लागून मेहफील संस्कृताय ना जावपाक पावल्या अशे फाटभुंयेर आशा वेलींगकारान आयोजीत केल्ले हे कार्यावळीचें मना पसून कौतूक करपी, रसिकांचे आभार मानपी आनी आपल्या सहकलाकारांची मानान वळख करून दिवपी संजिवनी आवाजा वांगडाच तिचें दर रूप ओडलायणें, तिचें गाणें आनंदाचें, शालीनतायेचें.
आकाशवाणी वयल्यान जायते कार्यक्रम हांव सादर करतां. आयकुप्यांचीं पत्रां, संदेश, फोन येतात. तांणी केल्लें कौतूक म्हाका खूब किदें दिवन वता. आज एक कलाकार गायतनाच निवेदन करीत सगली माहिती दीत आपली कला पेश करताली. म्हजे भशेनूच तांचें हे सादरीकरण हांव कान दिवन आयकतालें; दोळे भरून पळयतालें.
आरंभाची सुंदर अशी ही मेहफील पु. ल. देशपांडे हांच्या ह्याच उतरांची याद करून दिताली. उपजिविके खातीर गरजेचें शिक्षण मुजरत घेयात. पोटापाणयाचो उद्देग जिद्दीन करात, वांगडाच साहित्य, संगीत, नाट्य, खेळ हातूंतले एके तरी कले वांगडा इश्टागत करात. पोटापाणयाचो उद्देग तुमकां जगपाक शिकयतलो पूण कले कडेन तुमी जोडिल्ली इश्टागत तुमी किद्याक आनी कशें जगचें हें शिकयतली.
सूर संजिवनीचे…. अजुनूय कानांत घुमतात… घुमत रावतले.
चारूशीला दत्तराज देसाय
94211 50739
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
