भांगरभूंय | प्रतिनिधी
सूर्य जाण्टो जावन मेले उपरांत अब्जांनी वर्सां उपरांत आपल्या पोरण्या गिऱ्यांक चाबून खाता. शास्त्रज्ञांनी अशीच एक भिरांकूळ घडणूक पळयल्या. जेन्ना सूर्य मरतलो तेन्ना तो कांय गिऱ्यांक खातलो. अंतराळ शास्त्रज्ञांनी हें दृश्य डब्ल्यू. एम. केक प्रयोगशाळेंतल्यान पळयलें, जी हवाईच्या मावनेच दोंगरार आसा.
शास्त्रज्ञांनी पळयलें, एक धवेफुल्ल बटू नखेत्र आपल्या तुटिल्ल्या गिऱ्यांक खाता. हें नखेत्र सूर्य भशेन आशिल्लें आनी आतां मेलां. गिऱ्याक नश्ट जावपाक 30 अब्जां परस अदीक वर्सां लागलीं. हो सोद अजापीत करपी आसा. कनाडाच्या मॉन्ट्रियल युनिव्हर्सिटीचे एस्ट्रोफिजिसिस्ट एरिका लेक बोर्डेस हांणी सांगलें, ही गिऱ्यांची उदरगत आमच्या गिन्यानाक आव्हान दिता. एरिका ले बोर्डेस ह्या सोदाची मुख्य लेखिका आसा.
LSPM J0207+3331 नांवाचो हें नखेत्र पृथ्वी पासून 145 प्रकाशवर्स अंतराचेर आसा. धवें बटू नखेत्र सूर्या भशेनच्या नखेत्राचें निमाणे रूप आसता. सूर्य जेन्ना जाण्टो जातलो, तेन्ना तो लेगीत आपले भायले थर शेंवटून मारतलो आनी धवो बटू जातलो. शास्त्रज्ञांनी ह्या नखेत्राच्या थरांचेर 13 जड तत्वां सोदल्यांत, जी खूब चड आसात. चड करून हायड्रोजनांत भरिल्ल्या थंड धव्या बटू नखेत्रांत इतले तत्व मेळनात. एरिकाच्या म्हणण्या प्रमाण, ताची हवा चड दाट आसता. जड तत्व रोखडीच नखेत्रां भितर बुडटात. आमी विचार केल्लो, फकत कांय तत्व दिसतले, जाल्यार हिलीयमांत भरिल्ले गरम धवे बटू नखेत्रांनी चड वेळ मेरेन उरतात. हिलीयम हवा पारदर्शी आसता, ताका लागून तत्व लाखांनी वर्सां मेरेन दिसतात. पूण हायड्रोजन आशिल्लीं नखेत्रां अदीक आसतात. तीं आकाशगंगेंतले सगळ्यांत पोरणां नखेत्रां आसात. हाका लागून ह्या सोदांतल्यान पोरण्या गिऱ्यांची उदरगत कळपाची नवी पद्दत मेळटा.
30 अब्ज वर्सां आदली ही घडणूक आमच्या सूर्यमाळेक शिटकावणी दिता. 50 अब्ज वर्सां उपरांत सूर्य लेगीत धवो बटू जातलो. त्या वेळार गिऱ्यांची धुरी अस्थीर जावपाक शकता. बाल्टीमोराच्या स्पेस टेलिस्कॉप सायन्स इन्स्टिट्यूटाचे शास्त्रज्ञ डॉन डेब्साच्या म्हणण्या प्रमाण, नखेत्राच्या मरणा उपरांत हे सिस्टमींत मात्सी गडबड जाली. घडये नखेत्राचें वजन उणें जाल्ल्यान धुरी इबाडली वा सिस्टमीच्या दुसऱ्या गिऱ्यानी ताका धुकल्लो.
आनीक एका सोदा प्रमाण बुध, शुक्र आनी पृथ्वी सुर्यांत आस्पावतली. उरिल्ले गिरो वाटावतले. प्लुटो आनी नेपच्यून सारकिल्ले गिरे आनी हेर साबा उपगिऱ्यांचेर जीवन लायक परिस्थिती निर्माण जातली. थंय जीव जगपाक शकतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
