भांगरभूंय | प्रतिनिधी
भारतीय क्रिकेट नियामक मंडळान (बीसीसीआय) टी-20 आनी वन डे माळे खातीर भारताच्या पंगडांची घोशणा केली. टी-20 पंगडाचें फुडारपण सूर्यकुमार यादव करतलो, जाल्यार वन डे पंगडाचें मुखेलपद रोहीत शर्मा सांबाळटलो. विराट कोहलीचो लेगीत पंगडांत आस्पाव केला.
श्रीलंकेचे भोंवडेर भारताचो पंगड तीन टी-20 आनी तितक्योच वन डे मॅची खेळटलो. भारत निमाणे खेपे 2021त श्रीलंकेचे भोंवडेर गेल्लो. त्या वेळार वन डे माळ 2-1 आनी टी-20 माळ त्याच फरकान जिखिल्ली.
निवड समितीन टी-20 पंगडा खातीर हार्दीक पांड्याक कसलेंच पद दिवंक ना. ताका तंदुरुस्तीची समस्या आसा. पोरूं ताका साबार दुखापतींनी सतायला. ताका लागून निवड समितीन ताच्या बदला सूर्यकुमाराची मुखेली म्हणून निवड केल्या.
2018 वर्सा मुंबय इंडियन्सांत सामील जावचे पयलीं चार वर्सां मेरेन कोलकाता नायट रायडर्साचो उप मुखेली आशिल्लो. त्या वेळार गौतम गंभीर कोलकाताचो मुखेली आशिल्लो. 2018त जाल्ले पावणेंत मुंबय इंडियन्सान 3.2 कोटी खर्च करून ताका आपल्या पंगडांत घेतिल्लो.
रोहीत, कोहली वन डे पंगडांत
रोहीत शर्मा सयत विराट कोहलीचो लेगीत वन डे पंगडांत आस्पाव केला. 2023चे संवसारीक वन डे क्रिकेट सर्तीची फायनल खेळ्ळ्या उपरांत रोहीत आनी कोहली हांणी एकूय वन डे मॅच खेळूंक ना. मजगतीं, हर्षित राणा आनी रियान पराग हांकां पयले खेपे वन डे पंगडांत सुवात मेळ्ळ्या. रियान परागान आंतरराष्ट्रीय टी-20त भारताचें प्रतिनिधित्व केलां. पूण, हर्षिताक अजून मेरेन आंतरराष्ट्रीय क्रिकेटींत खेळपाची संद मेळूंक ना.
वन डे पंगडः रोहीत शर्मा (मुखेली), शुभमन गील (उप मुखेली), विराट कोहली, लोकेश राहुल, ऋषभ पंत, श्रेयस अय्यर, शिवम दुबे, कुलदीप यादव, मोहम्मद सिराज, वॉशिंग्टन सुंदर, अर्शदीप सिंग, रियान पराग, अक्षर पटेल, खलील अहमद, हर्षित राणा.
टी-20 पंगडः सूर्यकुमार यादव (मुखेली), शुभमन गील (उप मुखेली), यशस्वी जयस्वाल, रिंकू सिंग, रियान पराग, ऋषभ पंत, संजू सॅमसन, हार्दीक पांड्या, शिवम दुबे, अक्षर पटेल, वॉशिंग्टन सुंदर, रवी बिश्नोई, अर्शदीप सिंग, खलील अहमद आनी मोहम्मद सिराज.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
