भांगरभूंय | प्रतिनिधी
बार्बाडोस : भारतान टी-20 वर्ल्ड कप जिखलो आनी देशभर जल्लोष सुरू जालो, अजूनय ह्या जैताची चर्चा चालूच आसा. ह्या जैता बरोबरच आनीक एक चर्चा चालूच आसा. खासा करून भारत विरोधी देशांमदी, तशेंच भारतीय क्रिकेट पंगडाक उदकांत पळोवप्यां मदीं. सूर्यकुमार यादवान डेव्हीड मिलराची ह्या मॅचींत धरिल्ली कॅच वादाचो मुद्दो थारला. मात ह्या वादाचेर आतां पड्डो पडला. तरीकूय कांय लोक हें मानून घेवपाकूच तयार ना. कितें आसा प्रकरण पळोवया.
भारत आड दक्षीण आफ्रिका वर्ल्ड टी-20 क्रिकेट फायनलींत निमाण्या ओव्हरीच्या पयलो बॉल हार्दीक पांड्यान फुलटॉस घालो. डेव्हीड मिलरान ताचे झणझणीत शॉट मारलो, तेवेळार लॉंग ऑफा कडच्यान सूर्यकुमार यादव धांवत आयलो आनी सिक्सर वचपी बॉल धरलो, शिमेभायर वता-वता बॉल भितर वडयलो आनी सेकंदा भितर परत भितर येवन बॉल कॅच केलो. डेव्हीड मिलराक आवट दिलो आनी थंयच मॅच भारतावटेन आयली. निमाणे भारतान 7 धांवड्यांनी मॅच जिखून वर्ल्ड कप जिखलो.
भारतान वर्ल्ड कप जिखलो म्हूण जायत्या जाणांक कॉत्र गेले. खासा करून पाकिस्तान आनी तांच्या समर्थकांक. कुतां काडटना सूर्यकुमारान डेव्हीड मिलराची घेतिल्ली कॅच चुकीची म्हूण सोशल मीडियाचेर बोवाळ सुरू केल्लो. फाटले सप्तकभर ह्या कॅचीविशींच चर्चा चलताली. आतां ह्या कॅचीविशींचे सत् भायर आयलां तें अशें, ह्या मैदानार ह्यानपयलींय वर्ल्ड कपाच्यो मॅची जाल्लो. तेखातीर आयली खेळपट्टी वापरिल्ली. फायनलीखातीर कुशीची खेळपट्टी वापरली. कुशीची खेळपट्टी वापरतकच लॉंग ऑन-लाँग ऑफ हांच्या मदलो भाग आयल्यान आयलो. शीम सामकीच ल्हान आसपाक फावना म्हूण कायद्याप्रमाण शीम मात्शी मुखार व्हेली. पुराय मॅचीवेळार शीम तशीच आशिल्ली. तशेंच डेव्हीड मिलर बाद जायमेरेन थंय बॉल गेलोच ना म्हूण थंयसर कोणाचें लक्ष वचूंकच ना. तशेंच आदल्या मॅचींनी शीम थंय आशिल्ल्यान शीम आंखपाक लायिल्ल्या आडावळाचो दा थंय उरिल्लो. गवत पुरायपणान गेल्ले म्हूण स्पश्ट दिसताले. सूर्यकुमारान कॅच धरताच शीम हालयल्या म्हूण बोवाळ. ती शीम भारतीय वा दक्षीण आफ्रिकेच्या खेळगड्यांनी हालोवंक नाशिल्ली. मॅची पयलींच हालयल्ली. तेन्ना सूर्यकुमारा धरिल्ली ती कॅच चुकीची कशीच थारना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
