भांगरभूंय | प्रतिनिधी
पूण दोतोरांनी दिल्लीं वखदां घेवनय बी रुग्ण जर पथ्य पाळीना, मन खंबीर आनी आशावादी करून त्या दुयेंसा कडेन दोन हात करीना जाल्यार उपेग किते?
सुश्मिता सेन ही हिंदी सिनेमा सृश्टींतली एक प्रतिभावंत, तितलीच संवेदनशीलताय आशिल्ली अभिनेत्री. हेर मळाचेरुय तिणें वावर केला. समाजकार्यांत वावुरतना तिणें आपले अश्टताशी व्यक्तीमत्वान जिखिल्ल्या ‘मिस वर्ल्ड’ किताबाचें मोल जायते फावट सिद्द करून दाखयलां. ‘वास्तुशास्त्र, मै हुँ ना, मैने प्यार क्यों किया, क्योंकी मै झूठ नहीं बोलता, तुमतो ना भूल पायेगें सारकिल्ल्या सुपरहिट सिनेमांनी तिणें विविध तरांच्यो भुमिका केल्यात. हे विश्वसुंदरी अभिनेत्रीन जिणेंतलीं झुजांय बी खंबीरपणान झुजल्यांत आनी जिखल्यांतूय बी.
रुपेरी पड्ड्याचेर आव्हानात्मक भुमिका केल्ले हे विश्वसुंदरीन जिणेंतल्या अडचणीं- संकश्टां कडेन दोन हात करून आपलें खमकें व्यक्तीमत्व गेल्या कांय वर्सांनी संवसारा मुखार दवरलें. 2014 सालांत सुश्मिता सेन हांणी आपणाक अॅडीसन दुयेंस जाल्ल्याचें जाहीर केल्लें. ह्या भिरांकूळ दुयेंसा आड झुजतना चार वर्सां आपणें संघर्श केला, अशें ताणे म्हणलें. ह्या दुयेंस पिडेस्ताचे अड्रेनल ग्लॅण्ड काम करपाचे बंद करतात आनी खूब कमी प्रमाणांत कोर्टिसोल हार्मोन आनी अल्डेस्टेराॅयन हे हार्मोन्स आंगांत व्हांविल्ल्यान मनीस थकता, वजन देंवता, कात काळी पडटा, रक्तदाब देंवता, मीठ चड खायन दिसता अशी लक्षणां पळोवंक मेळटा. त्या कारणान मनशाक हो उणाव भरून काडपाक स्टेराॅयडाचीं इंजेसांवां आनी हेर वखदाचेर जायतीं वर्सां वा कांय वेळार जल्मभर अवलंबून रावचें पडटा. सर्वसामान्य मनीस हार मानून निरर्शेता. अशा वेळार हे अभिनेत्रीन चार वर्सां ह्या दुयेंसा आड मन खंबीर करून झुज दिलें. ‘आता फुडली जीण स्टेरॉयड आनी हेर ड्रग्स घेवनच सारची पडटली’ ही दोनोरान दिल्ली शिटकावणी तकलेंतल्यान भायर काडून मारली. गुरुत्वाकर्शण आड व्यायाम अजिबात करप ना (Anti gravity workouts) हो सल्लोय खंबीर मनाच्या सुश्मितान कुशीक दवरलो आनी योगाभ्यास, केलिस्थॅनिक्स, सूर्यनमस्कार, दंड, बैठका घालपाक सुरुवात केली.
कराटे आनी कुंग फू खेळटना वापरता तो नानचाकू घेवन ४६ वर्सां पिरायेची ही अभिनेत्री सद्दां सराव करपाक लागली.
निमाणें ह्या दुयेंसान हार मानली. ल्हवू ल्हवू अड्रेनल ग्रंथी परतून कार्यरत जाली. हॉर्मोन्स परतून जावपाक लागले, स्टेरॉयड आनी शरीराचेर गंभीर परिणाम करपी इंजेक्शनां, वखदां हांचो उपचार उणो- उणो जायत गेलो आनी 2019 वर्सां सावन परत ‘अडिसन’ भाऊचीं लक्षणां दिसलीनात. हे म्हणल्यार सगल्या लोकांक भंय घालपी, गांवगिऱ्या गुडांक घरा कडेन वचून मारबडय करून शेपटी तुट मेरेन धावंडून घालपा सारके जाले. सुश्मिता ताई जिखली. पूण रोगमुक्त जाले उपरांत ताणें व्यायाम सोडूंक ना. ती आयजय भलायकी आनी फिटनेस बरी दवरपाक लागून ह्यो सगल्या कसरती, व्यायाम करता आनी आजभय आयजच बी ‘आर्या’, ‘ताली’ सारक्या वेबसिरीजांनी जबरदस्त भूमिका करून प्रेक्षकांची मनरिजवण करता.
सुश्मिता सेन हांणी ‘अॅडिसन’ रोगा आड दिल्लें येशस्वी झूज आमकां शिकोवन वता. ती देख म्हणल्यार मनीस मानसीक शक्त आनी इत्साशक्तीच्या बळग्याचेर कितलेंय व्हड शारिरीक वा मानसिक अडचणीचेर मात करूंक शकता. पूण हे बरोबरच वैजकी उपचार बी गरजेचे आसात. तांका उणे लेखपाचो हांगा अजिबात हेतू ना. पूण दोतोरांनी दिल्लीं वखदां घेवनय बी रुग्ण जर पथ्य पाळीना, मन खंबीर आनी आशावादी करून त्या दुयेंसा कडेन दोन हात करीना जाल्यार उपेग किते? होवूय बी एक दृष्टांत आमकां ह्या उदाहरणांतल्यान पळोवंक मेळटा. ‘मन के हारे हार है, मन के जीत’ अशाच प्रकारचो संवाद हालींच येवन गेल्ल्या ‘छावा’ सिनेमानय लोकांनी आयकला.
मनशाचे विचार सकारात्मक आसत जाल्यारच ताचे शरीर रोगाचेर दिल्ल्या वखदांक प्रतिसाद दिवंक शकता. केन्ना- केन्ना तर मनशाचे शरीरच रोगांचें प्रतिरोधक लस (Antidote) कुडीनूच तयार करता, फक्त मनशाची लढपाची आनी झूज दिवपाची तयारी आसपाक जाय. हय मू? सुश्मिता सेन हांचे जिणेंतलो हो अणभव तुमकां आवडलाच आसतलो अशी आस्त बाळगितां.
– सनतकुमार फडते
70204 38469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
