सुविधा नात, पणजे इंटरस्टेट बस स्टॅण्डार लोकांचे हाल

भांगरभूंय | प्रतिनिधी

पणजीः पणजे इंटरस्टेट बस स्टॅण्डार कसल्योच सुविधा नाशिल्ल्यान प्रवाशांचे खूब हाल जातात. बस स्टॅण्डार आलाशिरो शेड नाशिल्ल्यान प्रवाशांत पावसांत भिजत बशीची वाट पळोवची पडटा.

कदंबा बसस्टॅण्डाक तेंकून इंटरस्टेट बसस्टॅण्ड आसा. मुंबय, पुणे, बंगळुरू आनी हेर थळार वचपी बशींक लागून हो बसस्टॅण्ड सदांच व्यस्त आसता. शेंकड्यांनी बशी आनी हजारांनी प्रवासी दर दिसा ह्या बसस्टॅण्डाचो वापर करतात. पूण सरकारान तांकां कसलीच सुविधा दिवंक ना. ह्या बस स्टॅण्डार आलाशिरो सोडात, बसपाक लेगीत धड सुवात ना. इतले दीस वतांत रावून बशीची वाट पळयताले, आतां पावस सुरू जाला म्हणटकच आतां तांचेर पावसांत भिजत बशीची वाट पळोवची पडटली.

पावसाळ्यांत ह्या बस स्टॅण्डार सगळे कडेन चिखल जाता. ताका लागून प्रवाशांत चिखलांतल्यान वाट काडीत वच्चें पडटा. प्रवाशांचे कपडे, सामान सगळें लोळटा. ह्या बस स्टॅण्डार सगळे कडेन घाण पातळ्ळ्या. नितळसाणीचेर कोणूच लक्ष दिना. बसस्टॅण्डाचे कुशीक आनी रस्त्यार कोयराच्यो राशी जाल्ल्यो दिश्टी पडटात. बस स्टॅण्डार शौचालय नाशिल्ल्यान महिला प्रवाशांचे खूब हाल जातात.

हे विशीं कदंबाचे संचालक डेरीक नेटो हांकां विचारल्यार तांणी सांगलें, हो बसस्टॅण्ड कदंब म्हामंडळ पळयना. तो थेट येरादारी खात्या खाला येता.

हे विशीं उलयतना समाज वावुरपी तनोज अडवलपालकार हांणी सांगलें, गोंयांत पर्यटकांचो वाडपी आंकडो लक्षांत घेवन 1995 ते 98 मेरेन सुभाष शिरोडकार हे येरादारी मंत्री आसतना कायद्यांत सुदारणा करून इंटरस्टेट प्रवाशां खातीर स्लिपर बशी सुरू केल्ल्यो. पूण दुख्खाची गजाल म्हणल्यार इंटरस्टेट प्रवाशां खातीर सुविधा दिवपाक येरादारी खातें अपेशी थारलें.

बस स्टॅण्डार देंवले उपरांत पर्यटक घाणीचें साम्राज्य पळयतात आनी गोंयचें नांव पेड्डेर जाता. कारण नासतना सरकार बसस्टॅण्डा वयले शुल्क आनी कर वाडयता, पूण थंय सुविधा दिवपाक अपेशी थारलां. सुविधा दिवंक जायना जाल्यार शुल्क घेवपांत अर्थ कितें, असो प्रस्न अडवलपालकार हांणी उपस्थीत केला. हो बसस्टॅणअड म्हणल्यार कावलां अड्डो जाला. कदंब म्हामंडळान हो बसस्टॅण्ड विस्तारीत केला आनी सगळो सोपो कदंब म्हामंडळ घेता, ताका लागून हाची देखरेख ही कदंब म्हामंडळाची जापसालदारकी. येरादारी मंत्र्यान हाची दखल घेवपाक जाय, अशें अडवलपालकार हांणी मागलां.