सुवार्थ दवरून प्रकल्पांक विरोध करचो न्हय

भांगरभूंय | प्रतिनिधी

डॉ. प्रमोद सावंत: धारगळे उड्डाणपुलाच्या बुन्यादी वेळार सांगणें

पेडणें: सरकार 50 वर्सांचो कार्यकाळ फुडलो दृश्टीकोन मुखार दवरून प्रकल्प उबारीत आसता. कांय जाण आपलो सुवार्थ दवरून प्रकल्पांक विरोध करतात. जाल्यार कांय जाण राजकी हेतान प्रेरीत जावन सरकारी प्रकल्पांक काणकोण सावन पेडणें मेरेन विरोध करीत आसतात. ते प्रकल्प कोणेंच आडावचे न्हय. तेच फाटभुंयेर धारगळे दोन खांब हांगासरल्या उड्डाण पुलाक सुरवातेक विरोध केल्लो म्हणून हो पूल रद्द जालो. आतां 42 कोटी परस चड खर्च करून उड्डाण पुलाक गती दितले अशें मुख्यमंत्री डॉ. प्रमोद सावंत हांणी सांगलें.
ते उड्डाणपुलाच्या बुन्यादी सुवाळ्यांत उलयताले. ह्या वेळार पेडणेंचे आमदार प्रवीण आर्लेंकार, धारगळचे सरपंच अर्जून कानोलकार, चांदेल- हसापूरचे सरपंच बाळा शेटकार, पंच भूषण उर्फ प्रदीप नायक, भौशीक बांदकाम खातें रस्तो विभागाचे प्रधान अभियंते उत्तम पार्सेकार, कार्वाल्हो बी मानेस्त हाजीर आशिल्ले.
मुख्यमंत्र्यां हस्तुकीं धारगळे दोन खांब हांगासरल्या 42 कोटी रुपयांच्या उड्डाणपुलांची बुन्याद आनी चांदेल हसापूर हांगासरल्या मुखेल रस्त्यार 30 कोटी रुपया खर्च करून नव्यान उबारतल्या पुलाचें उक्तावण केलें.
मुख्यमंत्र्यांनी मुखार उलयतना म्हणलें, लोकांक खंयच्याय प्रकल्पांक विरोध करपाची संवय जाल्या. ह्या राष्ट्रीय म्हामार्गार हाचे पलयींच हो उड्डाणपूल जावपाचो पूण लोकांनी विरोध केल्ल्यान तो उरलो. हो पूल नाशिल्ल्यान खूबशा जाणांक मरण आयलें. ताका विरोध करपीच जापसालदार आशिल्ल्याचें तांणी म्हणलें.
कांय सुवार्थी लोक स्वताचो विचार करून सरकारी प्रकल्पांक विरोध करीत आसतात, आनी अशे वृत्तींत खूब वाड जाल्या. ती खंय तरी नियंत्रणांत हाडूंक जाय. विरोध करप्यांक स्वताचें पडिल्लें आसता, तांकां सरकाराचें पडिल्लें नासता. लोकांचे तशेंच पर्यटकांचें पडिल्लें नासता. अपघातांत मरण आयिल्ल्या लोकांचेंय पडिल्लें नासता अशें मुख्यमंत्र्यांनी म्हणलें.
ज्या लोकांनी ह्या उड्डाणपुलाक विरोध केला तो ह्याच लोकांक लागून. ह्या पुलाक पांच वर्सां कळाव जालो. विरोध करूंक नाशिल्लो जाल्यार हो पूल 20 ते 25 कोटी रुपया भितर जातलो आशिल्लो अशें मुख्यमंत्री डॉ. प्रमोद सावंत हांणी म्हणलें. मजगतीं, तांणी नोव्हेंबर 2026 मेरेन हो उड्डाणपूल प्रकल्प तयार जातलो अशेंय तांणी म्हणलें.