भांगरभूंय | प्रतिनिधी
मुख्यमंत्री : सहकार भूषण उमेश शिरोडकार हांचो सत्कार
भांगरभूंय । प्रतिनिधी
म्हापशें : समाजांत सुवार्था बगर वावर करपी उमेश शिरोडकार हांचे सारक्या व्यक्तींचो वावर समाजा मुखार येवपाक जाय. शिरोडकार हे वास्तू विसारद मळा भशेनूच सहकार आनी समाजीक मळार समर्पीत भावनेन वावर करपी अवलिया सात, अशें मुख्यमंत्री डॉ. प्रमोद सावंत हांणी सांगलें.
म्हापशेंच्या श्री बोडगेश्वर देवस्थान सभाघरांत वास्तू विशारद आनी सहकार भूषण उमेश शिरोडकार हांच्या अमृत महोत्सवी वाडदिसा निमतान आयोजीत सत्कार सुवाळ्यांत मुख्यमंत्री मुखेल सोयरे म्हूण उलयताले. ह्या वेळार नगराध्यक्ष प्रिया मिशाळ, सहकार मंत्री सुभाष शिरोडकार, राज्यसभा खासदार सदानंद शेट तानावडे, उपसभापती ज्योशुआ डिसोझा, एजी देविदास पांगम, आमदार डॉ. चंद्रकांत शेटये, सत्कार सुवाळो समितीचे अध्यक्ष डॉ. गुरुदास नाटेकार, कार्याध्यक्ष उल्हास फळदेसाय आनी सचीव प्रा. रवींद्र फोगेरी हाजीर आशिल्ले.
मुख्यमंत्री डॉ. सावंत हांणी सांगलें, उमेश शिरोडकार हे फक्त पयश्यां फाटल्यान धांवनासतना आपल्या व्यक्तीमत्वाचो समाजा खातीर कसो उपेग जातलो, हे खातीर तांणी जीण सारली. अशे मनीस आयज समाजांत उणे जातना दिसतात. ते खातीर अशीं व्यक्तीमत्वां सोदून तांचो सत्कार, अमृत महोत्सव मनोवप खूब गरजेचें आसा. अशा व्यक्तीमत्वांतल्यान आयच्या तरणाट्यांक आदर्श मेळटलो. ते खातीर अश्या सत्कार सुवाळ्याची खर गरज आसा. कारण आयजे तरणाटे फक्त स्वताची कारकीर्द तशेंच तातूंतल्यान मेळपी पयसो आनी आपल्या कुटुंबा पुरते मर्यादीत आसतात, अशें तांणी सांगलें.
ह्या वेळार मंत्री सुभाष शिरोडकार, उपसभापती ज्योशुआ डिसोझा, खासदार सदानंद तानावडे आनी हेरांनी आपले विचार मांडले. डॉ. गुरुदास नाटेकार हांणी येवकार दिलो. कार्याध्यक्ष उल्हास फळदेसाय हांणी शिरोडकार हांच्या वावराचेर उजवाड घातलो.
सत्कारमुर्ती उमेश शिरोडकार हांणी आपल्या येसाचें स्रय आपले आवयक दिलें. तांच्याच योग्य मार्गदर्शनाक लागून आपूण 50 वर्सां आदीं मुंबय सारकिल्ल्या शारांत वचून वास्तू विशारद मळार कामगिरी करपाक शकलों. तशेंच आपल्या कुटुंबांतल्या खूब जाणांनी आपल्याक मार्गदर्शन केलें, अशें तांणी सांगलें. मुख्यमंत्री डॉ. प्रमोद सावंत हांचे हस्तुकीं शाल, नाल्ल, यादस्तीक चिन्न आनी मानपत्र दिवन उमेश शिरोडकार हांचो सत्कार केलो. विठोबा बगळी हांणी मानपत्राचें वाचन केलें. सुत्रसंचालन प्रा. रवींद्र फोगेरी हांणी केलें जाल्यार निशांत चणेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
