भांगरभूंय | प्रतिनिधी
वाळपय: ठाणे ग्रामपंचायत वाठारांतल्या सुर्ला गांवांत गोंय पर्यटन खात्या वतीन ‘इको टुरिझम प्रकल्प’ उबारतले. हाका सरकारान मान्यताय दिल्या. ह्या प्रकल्पाचें काम बेगीनूच हातांत घेतले. मात गोंयच्या कांय पर्यावरण मोगींनी ह्या प्रकल्पाक विरोध करून जनहीत याचिका न्यायालयांत दाखल केल्या.
मजगतीं, सुर्ला गांवांतल्या ग्रामस्थांनी ह्या प्रकल्पा विशीं विशेश ग्रामसभा घेवपाची मागणी केल्ली. ही ग्रामसभा आयतारा ठाणे पंचायतीच्या मल्टीपर्पज कॉम्प्लेक्सांत घेतली. हे ग्रामसभेंत ह्या प्रकल्पाक हजर आशिल्ल्या सगल्यांनी मान्यताय दिली. हो प्रकल्प सुर्ला गांवचे उदरगतीचो मार्ग मेकळो करपी आसा. हाका लागून हो प्रकल्प हांगा जावपाकूच जाय. तशेंच ह्या प्रकल्पा खातीर यत्न करपी थळावी आमदार डॉ. देविया राणे हांकां परबीं भेटोवन तिचें फाटल्यान खंबीरपणान उबें रावपाचो निर्धार ह्या वेळार घेतलो.
सरपंच निलेश पवार हांचे अध्यक्षते खाला एक ग्रामसभा घेतली. ह्या वेळार उपसरपंच सोनिया गांवकार, पंच वांगडी सरिता गांवकार, अनुष्का, सुभाष गावडे, सुरेश आयकार, विनायक गांवस, तनया गांवकार, सचिव सर्वेश गांवकार खासा हजर आशिल्ले.
सरपंच सुरेश आयकर हांणी येवकार दिलो. सर्वेश गांवकार हांणी फाटले ग्रामसभेचो इतिवृत्तांत वाचून दाखयलो.
सुर्लाचे थळावे प्रकाश गांवकार हांणी सांगलें, हो प्रकल्प गांवच्या दुश्टीकोनांतल्यान सामको म्हत्वाचो. सुर्ला गांव हो उंचायेर आसा. हांगा उदरगतीच्यो कसल्योच सुविधा नात. हो प्रकल्प हांगा सुरू जाल्यार गांवची उदरगत जावपाक संद मेळटली. हो प्रकल्प पुरायेन पर्यावरण पुरक आसा. हाका लागून ह्या प्रकल्पाक विरोध करपा बदला सगल्यांनी हाका फाटबळ दिवचे.
शाश्वत पर्यटनाचे उदरगती खातीर अशे तरेचे प्रकल्प सत्तरी म्हालाच्या विवीध सुवातांचेर सुरू जावप हे फुडारा खातीर सामके म्हत्वाचे. पणजी सारकिल्ल्या शारांत बसून असल्या प्रकल्पाक अशा प्रकल्पाक विरोध करप म्हळ्यार गांवचे उदरगतीक आडमेळें हाडपाचो प्रकार आशिल्ल्याचो आरोप ह्या वेळार तांणी केलो.
सरपंच निलेश परवार हांणी सांगलें, हो प्रकल्प पंचायतीचे उदरगती खातीर गरजेचो. ह्या प्रकल्पांतल्यान पंचायत आनी सुर्ला गांवची उदरगत जातली. ह्या प्रकल्पाक लागून हांगचे जैवविविधतेक कसलेच तरेचो धोको ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
