भांगरभूंय | प्रतिनिधी
सडा वाठारांत पर्यटन कुटिरां उबारतले, उदरगत आराखडो करपाच्या वावराक गती
भांगरभूंय । प्रतिनिधी
वाळपयः गोंय मुक्ती उपरांत पयलेच खेपे सत्तरी म्हालांतल्या सुर्ला वाठारांतलीं पर्यटन उदरगतीचीं दारां उक्तीं जातलीं. थंयच्या सडा वाठारांत पर्यटन कुटिरां उबारतले. पर्यटन उदरगतीच्या माध्यमांतल्यान खुबश्यो सुविधा निर्माण करतले. हे संबंदांत हालचालींक गती मेळ्ळ्या. गोंय रान उदरगत म्हामंडळाची अध्यक्ष डॉ. दिव्या राणे हांणी हालींच ह्या वाठारांत रान उदरगत म्हामंडळाचे कर्मचारी, रान कर्मचारी, पर्यटन खात्याचे कर्मचारी आनी थळावे पंच हांच्या वांगडा भेट दिवन सगळ्या वाठाराची पळोवणी केली.
गोंयचें माथेरान म्हूण वळख आशिल्ल्या सुर्ला वाठारांत पर्यटनाचे नदरेन उदरगत केल्यार ह्या वाठारांत व्हड प्रमाणांत पर्यटन फुलूं येता. हाचो परिणाम म्हणल्यार ह्या वाठाराक उदरगतीची गदी मेळटली. ह्या संबंदांतले यत्न फाटल्या कितल्याशाच वर्सां सावन सुरू आशिल्ले. थळावी आमदार डॉ. राणे हांणी गोंय रान उदरगत म्हामंडळाच्या अध्यक्षपदाचो ताबो घेतले उपरांत आपली पयली पसंती सुर्ला वाठाराक आसतली, अशी घोशणा केल्ली. ते नदरेंतल्यान ह्या वावराक सुरवात जाल्या. थंड हवेची सुवात म्हूण हो वाठार फामाद आसा. कर्नाटक, महाराष्ट्र तशेंच गोंयांतल्यान व्हड प्रमाणांत लोक ह्या वाठाराक भेट दितात.
सुर्लाचे लोकवसती सावन सुमार दोन किलोमिटर अंतराचेर सडा वाठार आसा. थंय पुर्तुगेज काळांतली पुलीस चौकी आशिल्ली. गोंय मुक्ती उपरांत हो वाठार पुर्तुगेज राजवटींतल्यान मुक्त जालो. हो वाठार समुद्रसपाटी पासून उंचायेर आशिल्ल्यान तशेंच सैमान नटिल्ल्यान कर्नाटक, महाराष्ट्रा सयत गोंयांतले लोक सैमाचो आनंद घेवपाक ह्या वाठारांत येतात. चड करून शेनवारा आनी आयतारा व्हड प्रमाणांत पर्यटक ह्या वाठारांत येतात.
ह्या वाठारांत पर्यटन कुटिरां उबारपाचो आराखडो तयार केला. हो आराखडो सध्या तरी मुळाव्या पांवड्याचेर आसा. मात कशें तरेन ह्या वाठाराची उदरगत जावपाक शकता हे संबंदांत आमदार डॉ. राणे हांणी संबंदीत खात्याच्या अधिकाऱ्यां वांगडा सडा वाठाराक भेट दिवन पळोवणी केली. ह्या वाठारांत पर्यटन उदरगतीच्या माध्यमांतल्यान बऱ्यो सुविधा निर्माण केल्यो जाल्यार महाराष्ट्रांतल्या महाबळेश्वरा भशेन पर्यटनाची बरी संद उपलब्ध जावपाक शकता, अशें डॉ. राणे हांणी स्पश्ट केला. तशेंच तांणी संबंदीत अधिकाऱ्यांक उदरगतीचो आराखडो तयार करपाचे निर्देश दिल्यात.
सडा वाठार म्हादय अभयारण्याच्या अखत्यारींत येता. ताका लागून थंय अभयारण्याच्या मार्गदर्शक तत्वांक पाळो दिवन पर्यटन उदरगतीक चालना दिवपाचो यत्न करतले. ह्या वेळार हाजीर आशिल्ल्या अभयारण्याच्या विभाग अधिकाऱ्यांक हे संबंदांत विशेश लक्ष दिवपाचे निर्देश दिल्यात. ह्या संबंदांतली कागदपत्रांचे सोपस्कार पुराय करपाची प्रक्रिया रोखडीच सुरू जातली. ते उपरांत टप्प्या टप्प्यान थंय उदरगत आराखड्याची अमलबजावणी करपाचे नदरेंतल्यान विशेश लक्ष दितले.
पर्यटन सुविधांक लागून उदरगतीक गतीः डॉ. राणे
सत्तरी म्हालांतलो सुर्ला वाठार हो म्हत्वाचो भाग. गोंय, महाराष्ट्र, कर्नाटक शिनेचेर आशिल्ल्या ह्या वाठारांत थंड हवामान आनी सरभोंवतणी पांचवोचार सैम आसा. ताका लागून ह्या वाठारांत पर्यटन उदरगतीच्या माध्यमांतल्यान चालना दितले. ह्या वाठारांत पर्यटन उदरगत सुविधा निर्माण केल्यो जाल्यार व्हड प्रमाणांत पर्यटक येतले आनी गांवच्या उदरगतीक लेगीत चालना मेळटली. तेचवरी सरकाराक लेगीत व्हड प्रमाणांत महसूल मेळटलो, अशें आमदार डॉ. दिव्या राणे हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
