भांगरभूंय | प्रतिनिधी
नवी दिल्ली, खबरां संस्था ः पयसुल्ल्यान चंद्र जितलो सोबीत आसा तितलोच तो वास्तवांत निर्जन आसा. धर्तरे वयल्यान आमकां चंद्र बर्फाळ दिसता, पूण चंद्राच्या पृश्ठभागाचेर प्रत्यक्षांत चिखल, धुल्ल आनी फोंडकुलां आसात. आतां चंद्राचेर फोंडकुलां तयार जावपाचें कारण शास्त्रज्ञांनी सोदून काडलां. सूर्याची भोंवतणीं भोंवपी लघुग्रह हो चंद्रा वयल्या फोंडकुलांचो कारण आसूं येता, अशें एका अभ्यासांत म्हणलां. विशेश म्हळ्यार हो लघुग्रह एकदां चंद्राचोच एक भाग आशिल्लो.
कमोओलेवा नांवाचो एक गूढ खडप
ह्या अहवाला प्रमाण चंद्राचेर आशिल्ले फोंडकुल लघुग्रहाच्या आघाताक लागून तयार जाला आनी तो लघुग्रह भायल्यान आमच्या सौर मंडलांत येता अशें जायत्या वर्सां सावन शास्त्रज्ञांचें मत आशिल्लें. 2016 वर्सा शास्त्रज्ञांनी सुर्याचे भोंवतणीं भोंवपी एक गूढ खडप सोदून काडलो. ताचो व्यास 130 ते 328 फूट मेरेन आसा. त्या खडपाचें नांव कमोओलेवा आशिल्लें.
जियोर्डानो ब्रुनो नांवाचे फोंडकुल
आतां खगोलशास्त्रज्ञ यिफेई जिओ हांच्या फुडारपणा खाला सिंघुआ विद्यापिठाच्या संशोधन पंगडान लाखांनी वर्सां आदीं हो खडप चंद्राचोच भाग आशिल्लो अशें सांगलां. चंद्रांतल्यान आयिल्ल्या स्फोटाक लागून चंद्राचेर 22 किलोमीटर अंतराचेर जियोर्डानो ब्रुनो नांवाचे फोंडकुल तयार जाले. सोळाव्या शेंकड्यांतल्या इटालियन विश्वशास्त्रज्ञाच्या नांवान जियोर्डानो ब्रुनो हें नांव पडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
