भांगरभूंय | प्रतिनिधी
घरां बेकायदेशीर आशिल्ल्याचो केलो दावो
मडगांव : बाणावले मतदारसंघांतल्या सुरावलेच्या दोरादो कुटुंबाच्या दोन घरांनी १०० मतदार नोंद आशिल्ल्याचें दिसून येता. हे सगले हेर राज्यांतले मतदार आशिल्ल्यान त्या घरांचीय पंचायती कडेन नोंद ना. हे विशीं जिल्लो वेंचणूक अधिकार्यां कडेन कागाळ केल्या. हाचेर कारवाय जावची, अशी मागणी ॲड. राधाराव ग्रासियस हांणी केली.
पत्रकार परिशदेंत उलयतना ॲड.. ग्रासियस हांणी एका घर नंबराचेर ८० आनी दुसर्या घर नंबराचेर २० मतदारांची नोंद आशिल्ल्याचें स्पश्ट केलें. ह्या वेळार तांचे वांगडा ज्योकीम डायस हाजीर आशिल्ले. ॲड. ग्रासियस हांणी सांगलें, बिहार, कर्नाटक आनी हेर राज्यांतल्यान गोंयांत आयिल्ल्या ८० मतदारांची नोंद ही एकाच घराचेर जाल्या. घर नंबर ८१ बी हाचेर मतदारांची नोंद करतना ८१ बी १, बी २, बीए अशीं विभक्त दाखयल्यांत.
सुरावली ग्रामपंचायती वतीन घरपट्टीची नोंदीच्या रजिस्टरची म्हायती घेवन घरा विशीं चवकशी केली. तातूंत हे घर नंबर दिसूंक नात. तशेंच आनीक एका घर नंबराचेर २० मतदारांची नोंद मेळ्ळ्या. दोरादो कुटुंबीयांच्या नांवान हें घर दाखयलां. ह्याच कामिलो दोरादो हांचो पूत उपसरपंच आसा. कॉंग्रेस फुडारी राहुल गांधी हांणी हो मुद्दो मुखार हाडला. मात, हे प्रकार सुरु आसात. बीएलओं कडल्यान घराघरांनी वचून त्या घरांत खरेंच मतदार रावता काय? हें पळोवपाची गरज आसा. मतदार वळेरेंत फेरफार करपाचो हो प्रकार. पांच वर्सां आदीं आदले सरपंच जुझे कुलासो हांणी हे विशीं कागाळ केल्ली. मात कांयच जावंक ना. उपरांत आतां ज्योकीम हांणी वेंचणूक अधिकार्यां कडेन कागाळ दाखल केल्या.
हे विशीं जिल्लो वेंचणूक अधिकारी आशिल्ले दक्षीण गोंय जिल्लोधिकार्यां कडेन कागाळ केल्या. मात ताचेर आजून कारवाय जावंक ना. आतां परत एक फावट हे कागाळी विशीं विचारतले. तांचे कडल्यान कसलेच तरेची कारवाय जावंक ना जाल्यार न्यायालयांत वचपाचो मार्ग उक्तो जातलो, अशेंय तांणी म्हणलें.
सर्वोच्च न्यायालयान दखल घेवपाची गरज : ॲड. ग्रासियस
वेंचणुकेंतल्यो चुकीच्यो बाजू खोडून काडपाची गरज आसा. बिहारचे मतदार वळेरेंतले प्रकार सगल्यां मुखार आसात. हाका लागून हे सगळे लोकशायेक घातकी आसात. देशांतली वेंचणूक प्रक्रिया ही पारदर्शक आसची. कसलेच तरेची फेरफार तातूंत आसपाक जायना. वेंचणूक आयोग पुरायेन सत्ताधारी पक्षाचे वटेन आशिल्ल्याचें दिसता. हाका लागून सर्वोच्च न्यायालयान हाची दखल घेवपाची गरज आसा, अशें मत ॲड. ग्रासियस हांणी मांडलें.
सांजेच्यावेळार ते येतात आनी मतदान करुन वतात. तांणी दिल्ल्या नाम्याचेर ते रावनात. ज्या घरांचेर तांणी मतदान कार्ड तयार केल्यांत, तीं घरांय बेकायदेशीर आसात. पंचायतीकडेन ह्या घरांच्या अस्तित्वाचीच नोंद ना, हे विशींय म्हायती घेतल्या. घर धनयाच्या ना हरकत दाखल्यार हीं मतदान कार्डां तयार केल्यांत. तांचे कडल्यान आधारकार्ड वा हेर कसलोच पुरावो घेवंक नाशिल्ल्याचें चवकशेंत दिसलां, अशें कागळदार ज्योकीम डायस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
