भांगरभूंय | प्रतिनिधी
ग्रामसभेंत मागणी : बिगर गोंयकारांचीं नांवां वळेरेंत आयलीच कशीं?
भांगरभूंय । प्रतिनिधी
मडगांव : सुरावली ग्रामसभेंत मतदार वळेरेचो मुद्दो चर्चेक आयलो. गांवांतले मतदार वळेरेंत बिगर गोंयकारांचीं नांवां आसात. तांचीं नांवां वळेरेंत आयलीच कशी असो प्रस्न उपस्थीत करून गांवाचे मतदार वळेरींतल्या मतदारांची प्रत्यक्ष पळोवणी करून फेरनिरिक्षण करचें, अशी मागणी ग्रामसभेंत केली.
सुरावलीची ग्रामसभा आयतारा जाली.
पंच डोमिंगो फर्नांडीस हांणी सांगलें, लोकांनी मतदार वळेरेचेर हरकत घेतल्या. ते प्रमाण वेंचणूक आयोगाक गांवांतल्या मतदारांचें सर्वेक्षण करपाची विनवणी करतले. तशेंच गांवांतलो कोयराचो प्रस्न गंभीर जाला. तातूंत लेगीत बिगर गोंयकारां कडल्यान, गाडयांतल्यान रस्त्या कुशीक कोयर उडयतात. बेवारशी सुण्यां कडल्यान तो कोयर उस्तून उडयतात. म्हयन्यांतल्यान एकदां कोयर काडून वाठार नितळ जावचो ना. थारावीक वेळांत कोयर काडपाची गरज लोकांनी उक्तायली.
गांवांतल्या वेस्टर्न बायपासा वयल्या रस्त्या वयल्यान अंतर उणें पडटा, हे खातीर चुकीचे वटेन गाडयो येवपाचे प्रकार घडटात. ताका लागून अपघाताची शक्यताय आसा. हाचे कडेन संबंदीत विभागान सुचोवणी तकटो लावन वा हेर उपाय येवजण्यो करून कारवाय करची, अशी मागणी केली. सुरावली अंडरपासाचो प्रस्न लेगीत परतून चर्चेक आयलो. थंय सदांच उदक सांचून रावता, हे खातीर तो वापरपाक योग्य ना. थंय केल्ल्यो उपाय येवजण्यो येसस्वी जावंक ना. ताचेर ठोस उपाय काडपाची गरज आसा, अशें लोकांनी सांगलें. केवीन सुझा हांणी सांगलें, फाटल्या 10 ते 15 वर्सां सावन गांवांत दुसऱ्या राज्यांतल्यान आयिल्ल्या लोकांची संख्या वाडत आसा. आतां मतदार वळेरेंत लेगीत तांचीं नांवां दिसपाक लागल्यांत. गांवांतलो लोकप्रतिनिधी वेंचून हाडपाचो अधिकार थळाव्या लोकांक जाय, पूण हें बिगर गोंयकार मतदार तांकां वेंचून हाडटात. हें पुराय चुकीचें आशिल्ल्यान गांवांतल्या दरेका घरांत कोण रावता आनी दरेका घरांत कितले मतदार आसात, ताची प्रत्यक्ष पळोवणी करची. कर्नाटक आनी हेर राज्यांतल्यान वेंचणुके वेळार मतदार येतात आनी ते मतदान करून परत वतात. गांवांत लोकशाय कायम उरची, होच हाचो मुख्य उद्देश आसा. ते खातीर मतदार वळेरी प्रमाण गांवांतल्या मतदारांचें सर्वेक्षण करचें, अशी विनवणी वेंचणूक आयोगा कडेन केली.
मतदार वळेरीची दुरुस्ती करपाची मागणी
सुरावली गांवांतल्या एका घरांत 80 परस चड मतदारांची नोंद जाल्ल्याचें कांय दिसां आदीं उक्तडार आयलां. मतदानांतल्यान गांवांतले लोकप्रतिनिधी वेंचून हाडटात. गांवांतले मतदार वळेरेंत बिगर गोंयकारांची नोंद जाली जाल्यार ताचो फायदो थारावीक लोकांक जातलो, ते गांवचो विचार करचे नात. हे खातीर गांवांतल्या मतदारांची नोंद परतून तपासची तशेंच प्रत्यक्ष पळोवणी करून मतदार वळेरेंत दुरुस्ती करपाची मागणी ग्रामसभेंत केल्या, अशें ग्वेन्सिया गोम्स आनी झेकील गोम्स ह्या तरणाट्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
