भांगरभूंय | प्रतिनिधी
मडगांव : सुरावलीच्या दोन घर नंबरांचेर १०० मतदारांची नोंद आशिल्ल्याचें समजले उपरांत बोगस मतदार आशिल्ल्याचो मुद्दो चर्चेक आयिल्लो. प्रत्यक्ष पळोवणे उपरांत जिल्लोधिकारी कार्यालयान वेंचणूक कार्यालयाक सादर केल्ल्या अहवालांत सुरावले बोगस मतदार ना, वेंचणूक आयोगाच्या कायद्या प्रमाण ही नांव नोंदणी वैध आशिल्ल्याचें म्हणलां.
सुरावलीच्या एका घरांत खुबशे मतदार आशिल्ल्याचें प्रकरण कांय दिसां सावन गाजतालें. हातूंत कॉंग्रेसी उपरांत ऍड. राधाराव ग्रॅसिअस हांणीय पत्रकार परिशद घेत मत चोरी जाल्ल्याचो मुद्दो अधोरेखीत केल्लो. ग्रामसभेंतूय मतदार वळेरेंतले खुबशे नोंदींचेर आक्षेप घेवन मतदारांचे वैधतेचे प्रस्न केल्ले. उपरांत मामलेदार, बीएलओ, उपजिल्लोधिकारी हांचे वतीन प्रत्यक्ष पळोवणी केली आनी मतदारांची तपासणी करपाक सुरवात जाल्ली. आतां अतिरिक्त जिल्लोधिकारी रमेश गांवकार हांणी दिल्ले म्हायती प्रमाण, प्रत्यक्ष पळोवणे उपरांत मुखेल वेंचणूक आयुक्त कार्यालयाक अहवाल सादर केला. हे पळोवणे उपरांत कसलेच तरेचो बोगस मतदार आशिल्ल्याचें दिसूंक ना. मुखेल वेंचणूक आयुक्त कार्यालयाक अहवाल सादर केल्ल्यान ब्लॉक लेव्हल अधिकारी, मामलेदार आनी उपजिल्लोधिकारी हांणी प्रत्यक्षांत ते सुवातेर वचून पळोवणी केली. तांणी केल्ल्या अहवाला प्रमाण मतदार वळेरी रावनाशिल्ले वा अपात्र नावान आसपाव ना. अधिकार्यांनी केल्ले चवकशेंत संबंदीत मतदार जायत्या वर्सां सावन सुरावले रावतात.
प्रत्यक्षांत केल्ले पळोवणे उपरांत संबंदीत मतदार सुरावली रावता. रावता ते सुवातेवेले मालमत्तेंत उपविभाग आनी तातूंत आनी आनीक उपविभाग आसात. हाका लागून नोंदणीकृत मतदारांचो आंकडो हेरां परस चड दिसता. मतदारांची पळोवणी केल्ले घर खूब माळयांचें आसा. जातूंत तळ माळये सयत वयले माळयेरूय आठ कुडी आसात. तांतल्या ३५ मतदारांची मतदार म्हणून नोंद आसा, तशेंच आनीकूय १६ लोक थंय रावतात. घराची विभागणी लक्षांत घेवन वेंचणूक आयोगाच्या कायद्या प्रमाण मतदारांच्यो ज्यो नोंदी ह्यान पयलीं केल्यात, त्यो वैध आशिल्ल्याचें दिसून आयलां, अशें अतिरिक्त जिल्लोधिकारी रमेश गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
