भांगरभूंय | प्रतिनिधी
पणजीः 28 फेब्रुवारी ते 1 मार्च मेरेन कला अकादमींत 42वो सुरश्री केसरबाई केरकार संगीत महोत्सव जातलो. 28 तारखेक सांजवेळा 5 वरांचेर मुख्यमंत्री डॉ. प्रमोद सावंत हांचे हस्तुकीं जातलो. थळाव्या आनी देशभरांतले नामनेचे कलाकार ह्या महोत्सवांत शास्त्रीय संगीत आनी नाच सादर करतले अशें कला अकादेमीचे अध्यक्ष बाबू कवळेकार हांणी सांगलें. बिरेस्तारा पणजे जाल्ले पत्रकार परिशदेंत ते उलयताले. प्रवीण गांवकार, प्रेमानंद पोळे आनी हेर पदाधिकारी हाजीर आशिल्ले.
कांय कारणांक लागून फाटलीं तीन वर्सां हो महोत्सव घडोवन हाडूंक नाशिल्ल्याचें कवळेकार हांणी सांगलें. पूण ह्या वर्सा आमी हो महोत्सव घडोवन हाडपाचें थारायलां. उक्तावण सुवाळ्या उपरांत गोंयचे पल्लवी पाटील शास्त्रीय गायन सादर करतले. हाचे उपरांत सांजवेळा 6.30 वरांचेर मुंबयचो भाग्येश मराठे गायन सादर करतले. 1 मार्चाक गोंयच्यान शकुंतला भरणे सकाळीं 10.30 वरांचेर गायन सादर करतली. रातच्या 11.45 वरांचेर छत्तीसगडांतल्यान आर्या नांदे ओडिसी नाच सादर करतली.
1 मार्चाक सांजवेळा 4.30 वरांचेर किशोर तेली आनी बुड्डेश तालकर हांचे मदली जुगलबंदी पळोवपाची संद मेळटली. सांजवेळा 5.45 वरांचेर दिल्लींतल्यान मीता पंडित शास्त्रीय गायन सादर करतली. सांजवेळा 7.30 वरांचेर मुळचे रघुनंदन पणशीकार गायतले. रोहिदास परब, अमर मोपकार, शैलेश गांवकार, मयंक बेडेकर, उदय कुलकर्णी, सुभाष फातर्पेकार, दत्तराज सुर्लीकार, दत्तराज म्हाळशी, वसंत गांवकार आनी वसीम खान ह्या महोत्सवाक साथ दितले अशें कवळेकार हांणी सांगलें.
बेगिनूच आडमेळीं पयस करतले
कला अकादेमीच्या कृती पंगडान तज्ञांचो सल्लो घेतला अशें प्रवीण गांवकार हांणी सांगलें. हांगाचो आवाज, उजवाड, ध्वनीक्षेपक आनी एसी हातूंत कांय चुको मेळ्ळ्यात. हे संबंदी बेगीनूच निमाणो निर्णय जातलो. जून मेरेन आमी चुको सुदारपाचो यत्न करतात. महोत्सवा खातीर सावंड सिस्टीम आवटसोर्स करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
