सुरय फटास

भांगरभूंय | प्रतिनिधी

राजकारणांत कोण कोणाचो कायमचो मित्र वा शत्रू आसना हें गोविंदान लक्षांत घेवंक जाय आसलें. पूण गोविंदाक तसलें कांय जमलें ना.

गोंयांत सद्याक फटासोच आयकूंक येता. आतां फटासो कोणाच्यो आनी खरें कोण उलयता तें कळप कठीण जालां. पणजी स्मार्ट जाता म्हणपाची फटास आयकून आयकून सामकी उबगण आयली पूण आयज जातली फाल्यां जातली म्हणटना काम सोंपच ना. स्मार्ट स्मार्ट म्हणीत फकत पयशांचो धूप जाता. आनीक एक फटास परत परत आयकूंक येता ती म्हणल्यार मंत्रीमंडळांत बदल घडटलो. आयज जातलो फाल्यां जातलो जावन जायना. केन्ना मुख्यमंत्री तर केन्ना पार्टीअध्यक्ष दिल्ली वारी करून येता. कोर्टांत वचून कशे लोक तारखो घेवन परततात तशेंच चित्र हांगाय दिश्टी पडटा. हो लेख बरोवंक बसलां तेन्नाच मुख्यमंत्री दिल्लीक गेला, मंत्रीमंडळांत रोखडोच बदल जावं येता म्हणपाची खबर वाचूंक मेळ्ळी. आतां हें तरी खरें काय हिवूय फटास तें लेख छापून येतासर कळटलेंच म्हणात.
आतां आयिल्ली खबर जर खरी आसत आनी जर मंत्रीमंडळांत इतले बेगीन बदल जावचो आसलो जाल्यार गोविंद गावडेचो पयलींच गोऽऽविंदा करचेली गरज नासली काय दिसता. बदल घडोवन हाडटनाच ताचोच भाग म्हणून गावडेच्या हातांत नाल्ल दिल्लो जाल्यार कोणाक कांय दिसचें नासलें. जे कोण दुखावल्यात तेय दुखावचे नासले आनी गावडेचेर अन्याय जाला हे समजुतीन ताच्या समाज बांधवां कडल्यान तशेंच हेर लोकां कडसून गावडेक जी सहानभुती मेळटा ती मेळची नासली. कोणाक जीब उखलून ताळ्याक लावची गरज पडची नासली वा कोणाक सुरय फटासूय मारचेली गरज पडची नासली काय दिसता. पक्षाक हाचो एके तरेन फायदोच जावपाचो. पूण बदल बेगीन जावचो ना हें खबर जाल्ल्यानूच तर ताका बेगोबेग काडलो. म्हणटकूच परत एकदां मंत्रीमंडळ बदलाची वावडीच आसूंक शकता अशें दिसना?
गोविंद गावडेक काडलो कित्याक तर ताणें खंय शिस्त मोडली अशें पक्षाध्यक्ष सांगता. आतां शिस्त मोडली म्हणजे कितें केलें ताणें असो प्रस्न उबो जाता. तो पक्षा आड कांयच उलयलो ना. ताणें पक्षा आड कसलें कर्तूब केलें अशेंय ना. ताणें फक्त एका खात्यांत चलतल्या भ्रश्टाचाराचेर बोट दाखयलें. खरें तर ताचें चुकलेंच. खंय कितें उलोवचें हें ताका कळ्ळेंच ना. तातूंत सद्याक तर भ्रश्टाचार हो शिश्टाचार जाला म्हणपाचें ताका कळूंक जाय आसलें. एक मंत्री आपल्याच सरकाराच्या खंयच्या तरी खात्यांतल्या भ्रश्टाचाराचेर जाहीरपणान उलोवन आपल्याच सरकाराक लज करता हें सारकें? जाय तर ताच्यान योग्य वाटेन वचून भ्रश्टाचार करतल्यांक बुद्द शिकोवंक जाताली. पूण ताणें तशें केलें ना. तो फक्त जाहीर उलयलो, हातूंत ताचो हेतू कोणाक तरी लज करची होच आसलो काय?
बरें ताणें आरोप केलो जाल्यार ताची चवकशी जावंक नाका आसली? खरेंच त्या खात्यांत अशें कितेंय घडटा काय कितें? आनी घडटा जाल्यार त्या लोकांक ख्यास्त जावंक जाय आसली. पूण तशें कांय घडलेंच ना आनी आरोप करतल्याचेर ताणें शिस्त मोडली म्हूण कारवाय जाली. हाचे पयलींय मंत्र्यांक सकयल देंवयल्यात पूण तांचेर नोकऱ्यां खातीर पयशे घेतले म्हणपाचे आरोप जाले म्हूण. तशें त्या आरोपांत तथ्य आसलें. आनी तेन्नाय एका मंत्र्यानूच दुसर्‍या मंत्र्याचेर आरोप केल्लो. पूण आरोप करतल्याक कोणे जाप विचारली ना. जाचेर आरोप जाल्लो ताकाच घरा धाडलो. उपरांत लोकांनीच ताका घरा बसयलो. अर्थांत हें फाटल्या मंत्रीमंडळांत घडिल्लें. ह्याच मंत्रीमंडळांतूय आरोप जावन एकल्याचें मंत्रीपद गेलां. पूण आतां गोविंदाचे बाबतींत मात वेगळेंच घडलां. जांचेर आरोप जाल्यात ते शें सुस्त आसात आनी एकल्या मंत्र्याक पद सोडचें पडलां.
तशे हाचे पयलीं गोविंद गावडेच्या खात्यांचेरूय आरोप जाल्यात आनी उपरांत ते आरोप फट आसले म्हणपाचेंय सगल्यांक कळ्ळांं. आरोप करपी मंत्रीमंडळाचोच भाग आसलो तरी ताचेर कांयच कारवाय जावंक ना. हाचोच अर्थ पक्ष मनीस पळोवन निर्णय घेता असो जालो ना? फाटल्या लेखांत म्हणलां तेवरी गोविंद गावडेन आपले जिबेर ताबो दवरूंक जाय आसलो. पूण ताका तें केन्नाच जमलें ना आनी आतांय जमना. कला अकादमीचेर आरोप जावंक लागले, टेंडर करिनासतना काम दिलें म्हूण गोविंदाचेर आरोप जावंक लागले तेन्ना ताजमहालाची उपमा दिनासतना गोविंदान जर हात वयर केल्ले आनी हें काम भौशीक बांदकाम खातें करता तांकांच हें विचारात म्हणिल्लें जाल्यार गोविंद टिकेचो धनी जावचो नासलो. पूण तो आपल्या वर्गमित्राक सांबाळूंक गेलो आनी स्वता शेंणलो काय दिसता.
राजकारणांत कोण कोणाचो कायमचो मित्र वा शत्रू आसना हें गोविंदान लक्षांत घेवंक जाय आसलें. पूण गोविंदाक तसलें कांय जमलें ना. दुस्मान तो दुस्मान, कायमचो दुस्मान आनी मित्र तो मित्र होच विचार घेवन तो वावुरलो. हाकाच लागून तो ढवळीकाराक आपलो कायमचो शत्रू मानून वागलो वा अजून वागता. पूण आपूण चुकतालों म्हणपाचो अणभव ताका आयज आयला आसूंक जाय. आपूण मित्राक सांबाळूंक गेल्लों पूण मित्रान आपणाक जाय तेन्ना सांबाळ्ळो ना म्हणपाचो अणभव ताका आयलोच न्ही? इतल्यान गोविंद सुदारतलो? ना! तो आतां पक्ष शिस्त मोडटलो. पक्षाध्यक्षाचेर आरोप करून ताणें सुरवात केल्या. तो पक्ष सोडचो ना आनी पक्षांतल्या पदाधिकाऱ्यांचेर उलोवपाचेंय सोडचो ना.
पक्षाक गोविंद हो हून दुदाचो घोंट जातलो काय दिसता. तो पक्ष सोडचो ना. कारण पक्ष सोडल्यार आपसूक ताची आमदारकी वतली. पक्ष ताका काडचो ना. ताका पक्षान काडल्यार ताचोच फायदो. आमदारकी उरतली आनी इल्ली सहानभुतीय वाडटली जी ताका येता ते वेंचणुकेंत उपकारा पडटली. आतां पक्ष कितें करतलो तें कळटलेंच, आमी फक्त पळोवपाचें आनी फटासो आयकुपाच्यो.

अभयकुमार वेलींगकार
9423884687