सुरतांत गणेश मंडपाचेर गुंडे मारिल्ल्यान तणाव, २७ जाणांक अटक
भांगरभूंय | प्रतिनिधी
सुरत, खबरां संस्था : हांगाच्या लालगेट वाठारांत आयतारा भौशीक गणपती मंडपाचेर स तरणाट्यांनी गुंडे मारले. ही खबर कळटकच शेंकड्यांनी लोक रस्त्याचेर देवून आंदोलन करपाक लागले. रातचें निशेधाक हिंसक मोडण मेळ्ळें. हातूंत दोनूय वटेनच्या आंदोलकां सयत पुलिसूय जखमी जाल्यात. आंदोलकांनी गाडयो फोडून तांकां उजोय लायलो. ह्या प्रकरणांत त्या स तरणाट्यांक आनी गुंडे मारपाचे घडणुकेचें समर्थन करपी २७ जाणांक अटक केल्या. अटक जाल्ले लोक दुसऱ्या धर्माचे आसात. तातूंत दोन ल्हान भुरगेय आसात. सोमारा सुर्याचें पयलें किरण येवचे पयलीं दोशी व्यक्तींक अटक करतले, अशें आयतारा गुजराताचे गृहमंत्री हर्ष सिंघवी हांणी सांगिल्लें.
आयतारा रातचो पुलिसांनी लाठीमार केलो. दुकां धुंवराच्यो कांडयो फोडल्यो. सधया थंय एक हजार पुलीस दवरल्यात. मजगतीं, थळावे आमदार कांती बलार शांततेचें आवाहन करपाक आयिल्ले. तांचो आनी पुलिसांचो वाद जालो.
ड्रोना वरवीं पाळत
सय्यदपुरा वाठारांत पुलिसांनी सोद मोहीम चालीक लायल्या. गुंडे त्या तरणाट्यांनीच मारले काय आनीक कोणे ताचो पुलीस सोद घेतात. दोन धर्मीक गटां मदीं संघर्श जावचो न्हय, म्हूण ड्रोना वरवीं पाळत दवरल्या. पुलिसांनी कोम्बींग आॅपरेशनूय सुरू केलां. लोकांक भायर आपयल्यार परिस्थिती इबाडटली, म्हूण पुलिसांनी मंडपा लागसारच्या घरांनी वचून चवकशी केली. सध्या तणाव आसलो तरी वातावरण शांत आसा, अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
