भांगरभूंय | प्रतिनिधी
भांगरभूंय प्रतिनिधी
पणजी : गोंय हे दर्यादेग आनी पर्यटन थळ आशिल्ल्यान सुरक्षे विशीं गंभीर आसपाची गरज आसा. सर्वे तशेंच वैजकी उपकरणां पावोवपा सयत आतां सुरक्षा वेवस्थे खातीर ‘ड्रोण’चो वापर जातलो, अशें मुख्यमंत्री डॉ. प्रमोद सावंत हांणी सांगलें. राज्याच्या ड्रोन धोरणाचो शुभारंभ तांचे हस्तुकीं जालो.
कार्यावळीक म्हायती तंत्रज्ञान खात्याचे मंत्री रोहन खंवटे, म्हायती तंत्रज्ञान म्हामंडळाचे अध्यक्ष डॉ. चंद्रकांत शेट्ये हाजीर आशिल्ले. ह्या वेळार अॅडीटिव्ह मॅनुफॅक्चरिंग हबाचें उक्तावण जालें. गोंयची वाटचाल इलेक्ट्रॉनीक हब जावपाचे दिकेन सुरू आसा.
राज्यांत ड्रोणाचो वापर वाडत आसा. ड्रोणाचो वापर सुरळीत जावपा खातीर सरकारान धोरण तयार केलां. हाचें पयलीं तेलंगणा आनी हिमाचल प्रदेश ह्या दोन राज्यांनी ड्रोण धोरण तयार केलां. ड्रोण धोरण तयार करपी गोंय हें तिसरें राज्य. दिसान दीस ड्रोणाचो वापर वाडत आसा. सर्वे, आपत्ती वेवस्थापन, सुरक्षा हाचे खातीर ड्रोणाचो वापर करपाची तजवीज धोरणांत आसा. पर्यटन, खण वेवसाय, शेती, भलायकी, गस्त हाचे खातीर ड्रोणाचो वापर जावप शक्य आसा. मुंबय शार लेगीत दर्यादेग वाठारांत येता. मुंबयचेर हल्लो करपी आतंकवादी हे दर्या मार्गान आयिल्ले. गोंयाक लेगीत सादूर रावपाची गरज आसा. सुरक्षे खातीर हाचे फुडें ड्रोणाचो वापर जातलो, अशें मुख्यमंत्री डॉ. सावंत हांणी सांगलें.
आप्टीकल फायबरान 228 गांवां जोडटलें
इंटरनॅट सेवेंत सुदारणा जावपाची गरज आसा. ‘हर घर फायबर येवजण’ चालीक लावन इंटरनॅट सेवा सुदारपाचे यत्न जातलें. राज्यातल्या बारा म्हालांतल्यो 191 पंचायती आनी 228 गांवांनी ऑप्टीकल फायबरचे जाळें पावयतले. हाका लागून दर एकल्याच्या घरांत इंटरनॅट सेवा उपलब्ध जातली, अशें म्हायती तंत्रज्ञान खात्याचे मंत्री रोहन खंवटे हांणी सांगलें.
तुयां इलेक्ट्रॉनीक सीटीचें भूंयखंड वांटपाचो वावर सुरू आसा. उद्देजकां कडल्यान बरो प्रतिसाद मेळटा. बंगळुरु, हैदराबाद हांगाच्यो आयटी कंपनी तुयें इलेक्ट्रॉनिक सीटींत केंद्र सुरू करपाचे आसात. अॅडीटिव्ह मॅनुफॅक्चरींग हबाच्या ‘थ्री डी’ प्रिंटराक लागून प्रोटोटायम सुटे भाग तयार करप शक्य जातलें. मोटारीचो एखादो पार्ट मेळना जालो, जाल्यार तो तयार करप शक्य जातले. ‘थ्री डी’ प्रिंटराचो बरोच लाव जातलो, अशें खंवटे हांणी सांगलें.
हे वेळार अध्यक्ष डॉ. चंद्रकांत शेट्ये हांचे उलोवप जाले. वखदांच्या येरादारी खातीर द्रोणाचो वापर जावप शक्य आसा. हेर देश वखदां पावोवपा खातीर द्रोणाचो वापर करपाक लागल्यात, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
