भांगरभूंय | प्रतिनिधी
पणजीः नव्या वर्साक येवकार दिवपाक पर्यटकांनी गोंयांत बरीच गर्दी केल्या. देशी तशेंच विदेशी पर्यटक पुराय गोंयांत सध्या पळोवपाक मेळटात. हेच फाटभूंयेर राजधानी पणजे सयत गोंयच्या हेर वाठारांनी कसलोच वायट प्रकार घडचो न्हय, तशेंच येरादारी कोयंडी, अपघात घडचें न्हय म्हणून पुलीस बरेच शिटूक रावल्यात. पुलीस खात्यान थळावे आनी पर्यटकांच्या खातीर सुरळीत आनी सुरक्षीत येरादारी वेवस्थापना खातीर सहकार्य करपाचो उलो मारला.
कळंगूटे, बागा, कांदोळे, हणजूण, पणजी आनी मडगांव सारक्या वाठारांनी पर्यटकांचे गर्देक लागून, तशेंच उत्सव, कार्यावळींक लागून येरादारी कोयंडी जावपाची शक्यताय आसा. हेच फाटभूंयेर पुलिसांनी वाहन चालकांक येरादारी नेम पाळपाचो उलो मारला. ह्या संबंदीत वाठारांनी नियुक्त पार्किंगची वेवस्था केल्या. येरादारी सुरळीत जावचे खातीर बेकायदो पार्कींग करप्यांचेर खर कारवाय करतले. नवें वर्स मनयतना सोरो पियेवन वाहन चलोवं नाकात, अशे आदेश येरादारी खात्या वतीन वाहनचालकांक दिल्यात. पुलिसांचे पंगड सगळेच कडेन तैनात आशिल्ल्यान सोरो पियेवन गाडी चलोवप्यांचेर खर नदर आसतली. तशेंच येरादारी नेम मोडप्यांचेर खर कायदेशीर कारवाय करतले, अशेंय सांगलें.
चड येरादारी आशिल्ल्या भागांत तात्पुरती येरादारी वळोवपाक शकता. उपकार कारून ट्रॅफिक पुलिसांचे निर्देश आनी रस्त्यावेल्या येरादारी वेवस्थेच्या सुचोवण्यो पाळच्यो. दुचाकी चालकांनी हॅल्मेट घालप गरजेचें, तशेंच रस्त्यावेल्यान चलतना तिग जाणांनी चलचें न्हय, अश्यो सुचवण्यो येरादारी पुलिसांनी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
