भांगरभूंय | प्रतिनिधी
वाॅशिंग्टन, खबरां संस्था ः संवसारांतल्या सुरक्षीत देशांचे वळेरेंत अमेरिकेचो क्रमांक 89 वो आसा. संवसारभरांतल्या लोकांक उद्देग आनी शिक्षणा खातीर चड पसंत आशिल्ल्या देशाक सुरक्षेच्या मळार इतलो उणो क्रमांक पळोवन जायत्या जाणांक धक्को बसूं येता. विशेश म्हणल्यार सुरक्षा मळार भारत आनी पाकिस्तान अमेरिके परस फुडें आसात. संवसारांतल्या सुरक्षीत देशांच्या वळेरेंत पाकिस्तान 65 वे आनी भारत 66 वे सुवातेर आसा.
दक्षीण युरोपांतलो अॅण्डोरा हो ल्हान देश संवसारांतलो सगळ्यांत सुरक्षीत देश अशें नुम्बेओच्या सेफ्टी इंडेक्सांत म्हणलां. अॅण्डोराच्या एके वटेन फ्रांन्स आनी दुसरे वटेन स्पेन हे दोन देश आसात.
नुम्बेओन 2025 वर्साचो देशा प्रमाण सुरक्षेचो निर्देशांक आनी ते प्रमाण एकठांय केल्ली म्हायती सादर केल्या. ते खातीर तांणी तांच्या संकेतथळाक भेट दिवपी लोकांचे सर्वेक्षण केले. ते प्रमाण 146 देशांची वळेरी उजवाडाक आयल्या. खंयच्या देशांत दिसा वा रातच्या वेळार भोंवतना कितलें सुरक्षीत दिसता? गुन्यांव, लुटमार, चोरी, गाडयो चोरप, अनवळखी मनशां कडल्यान हल्लो, भौशीक सुवातेर छळ, भेदभाव, लिंग आनी धर्म हांचेर आदारून केल्लो भेदभाव आनी तातुंतल्यान निर्माण जावपी गुन्यांव हांचो विचार करून हें सर्वेक्षण केलां.
नुम्बेओन तांच्या वापरप्यांनी दिल्ले म्हायतीचेर, सर्वेक्षण प्रतिसादाचेर, शेअर केल्ले अणभव आनी डेटाचेर आदारीत सुरक्षीत आनी असुरक्षित देशांची वळेरी सादर केल्या. संवसारांतले वेगवेगळे देश आनी शारांतल्या लोकांच्या जिणेच्या खर्चा संबंदीत म्हायती एकठांय करपी आनी सर्वेक्षण करपी नुम्बेओ ही एक माची आसा.
सगळ्यांत सुरक्षीत 10 देश – अॅण्डोरा, युनायटेड अरब अमिराती, कतार, तैवान, ओमान, आयल ऑफ मॅन, हाँगकाँग, अर्मेनिया, सिंगापूर आनी जपान.
सगळ्यांत असुरक्षीत 10 देश – व्हेनेझुएला, पपुआ न्यू गिनी, हेटी, अफगाणिस्तान, दक्षीण आफ्रिका, हॉन्डुरस, त्रिनिदाद आनी टोबॅगो, सीरिया, जमैका आनी पेरू.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
