भांगरभूंय | प्रतिनिधी
अहमदाबादांत जाल्ल्या अॅर इंडिया विमान अपघातांत सुमार तिनशें निरपराधी नागरिकांक मरण आयले उपरांत निमाणें सरकार आनी विमान कंपनी शुद्धेर आयल्या. अपघाता उपरांतच्या दिसा अॅर इंडियाचीं सात आंतरराष्ट्रीय विमानां रद्द जालीं. हेर विमान कंपनींच्या पायलटांनीय सुरक्षेचे खर नेम चालीक लावपाक सुरवात केल्ल्यान जायतीं विमानां रद्द जालीं वा वळोवचीं पडलीं. पूण हो अचकीत बदल कित्याक? विमान अपघात जाल्ल्यान ही घडणूक चर्चेंत आशिल्ली. पूण देशभरांत नेमान जावपी अपघातांत दर वर्सा हजारांनी लोकांचो जीव वता, मागीर तो बशींत आसूं, रेल्वेंत आसूं, रस्त्यार आसूं, धर्मीक उत्सवांत आसूं वा भलायकी सुविधांनी आसूं. दुर्दैवान अशा घडणुकां विशीं आंकडेवारी दामपाचेर सदांच भर दितात.
देखीक, हालींच्या एका अहवालांत कुंभ मेळा खेटाखेटीत मरण आयिल्ल्यांचो प्रत्यक्ष आंकडो अधिकृत आंकडेवारी परस अडेज पटींनी चड आशिल्ल्याचें स्पश्ट जालां. उपरांत जायत्या आंतरराष्ट्रीय संघटणांनी केल्ल्या विश्लेशणांत भारत सरकारान कोरोना काळांत लेगीत सादर केल्ले आंकडे वास्तवां परस चड दिसून आयलें. उत्तर प्रदेशांतल्या कुंभ मेळाच्या वेळार गंगेंत व्हांवपी मड्यांचो उल्लेख करपाचें लेगीत सरकारान टाळ्ळें! प्रस्न असो की जो मेरेन आमी अपघाताक अपघात म्हूण मान्यताय दिनात तो मेरेन ताची निवारण करपाची प्रक्रिया कशी सुरू जावंक शकता?
रेल्वे अपघातांचें चित्र वेगळें ना. कितल्याशाच अपघाता उपरांत सुरक्षे खातीर जाय आशिल्लें तंत्रज्ञान फक्त कागदाचेर उरता. निर्णय घेतल्यार लेगीत अंमलबजावणी सामकी बेगीन जायना. कांय वेंचीक मार्ग सोडल्यार प्रवाशांचें जिवीत धोक्यांत उरता. रस्त्याची परिस्थिती आनिकूय भिरांकूळ, फोंडकुलां, बेशिस्त येरादारी, हेडगीं जनावरां, सोरो पियेल्ले वाहन चालक आनी तरी लेगीत व्हडलीशी कारवाय जायना. हवाई प्रवासी हो तुळेन गिरेस्त लोकांचो आशिल्ल्यान तांची सुरक्षेची जतनाय घेतात. पूण रेल्वे आनी बशीन भोंवपी लोकांची स्थिती शशी थरुराच्या उतरांनी ‘कॅटल क्लास’ सारकीच आसता. ते प्रवासांत गर्दी, घाण आनी अपमान सहन करीत भोंवतात.
मुंबय सारकिल्ल्या शारांत लेगीत लोक रेल्वेच्या दारार लटकून भोंवतात आनी तशें करतना कांय जाणांक मरण येता तें दृश्य पळोवन खूब दुख्ख जाता. भिरांकूळ अपघातांचे घडणुके उपरांत सरकार कांय वेळ जागृत जाता. घोशणा, समित्यो तयार करतात, पूण रोखडेंच सामुहीक विसरपाच्या ल्हारांत खंयचे खंय व्हांवून वता. लोकशायेंत नागरिकांची सुरक्षीतताय हें पयलें प्राधान्य आसूंक जाय, पूण भारतांत लोकसंख्या इतली व्हड आसा की मरणां लेगीत फक्त आंकडे उरतात. आयज भौशीक सेवांचें खाजगीकरण नेटान जायत आसा. रेल्वे स्टेशनां, विमानतळां, हॉस्पिटलां – आतां सुरक्षेक लागून न्हय, तर चढ महसूल निर्माण करपाक. नेम पाळ्ळे जाल्यार वेवसाय ठप्प जातलो, देखून तांचे प्राधान्य वळेरेंत लेगीत नात. हें फक्त भारतांत न्हय, ही संवसारीक प्रवृत्ती जाल्या. वखदां कंपनीं सावन बांदकाम कंपनीं ते विमान निर्माते मेरेन सुरक्षेच्या नेमांक आडनदर अब्जांधिशांक फायदो मेळचो ह्या हेतान जाता. लॉबिंग आनी वाटाघाटी करप हो आर्विल्ल्या उद्देगधंद्यांचो ‘धर्म’ जाला.
टाटान हालींच जी भिरांकूळ स्थितींत आशिल्ली अॅर इंडियाचीं विमानां विकतीं घेतलीं. आतां ह्या विमानांची सुरक्षा सरकारी एजन्सीच्या हातांत आसा. पूण विमानां स्वता खटारीं आसल्यार तांकां प्रस्न करपी लोकांक ओगी करप ही अलिखीत संहिता. सध्याचो हो सावधानतायेचो टप्पो
कितलो तेंप चलतलो तें पळोवप मजेशीर जातलें. अहमदाबाद घडणुकेक लागून हवाई प्रवासी केंद्रस्थानार आयल्यात. पूण fरेल्वेमार्गाचेर आनी रस्त्यांचेर चलपी कोटी कोटी सादारण नागरिकां मेरेन सरकारी अंमलबजावणी पावता काय ना हें लक्षात घेवप म्हत्वाचें.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
