भांगरभूंय | प्रतिनिधी
मुख्य वीज अभियंत्याची नोटीस
फौजदारी कारवायेची शिटकावणी
लायनमनांच्या सुरक्षे खातीर निर्णय
भांगरभूंय । प्रतिनिधी
पणजी : जे गिरायक गरजेचे सुरक्षा उपाय करिनासतना जनरेटर वा वीज निर्मितीचीं उपकरणां बसयतात तांचेर विजेची जोडणी तोडपा सयत हेर फौजदारी कारवाय जातली, अशी शिटकावणी मुखेल वीज अभियंत्यान दिल्या. हे विशीं सुचवण्यो तशेंच नोटीस वीज खात्यान जारी केल्या.
खूबशीं आस्थापनां आनी सामान्य गिरायक वीज पुरवणे खातीर जनरेटर वा इन्वर्टर हीं उपकरणां बसयतात. हीं उपकरणां बसयतना अर्थींगा सयत हेर सुरक्षेचे उपाय करप गरजेचें आसतां. खूबशे जाण सुरक्षा उपाय येवजण करिनात. हाका लागून ट्रान्सफॉर्मर तशेंच हेर दुरुस्तीचीं कामां करपी लायनमॅनांक धोको आसता. सुरक्षा उपाय येवजण नाशिल्ल्यान लायनमनांक शॉक येवपाच्यो घडणुको घडल्यात. हे फाटभुंयेर वीज खात्यान शिटकावणी दिवपी नोटीस जारी केल्या. जनरेटर वा इन्वर्टर बसोवपा खातीर मान्यताय घेवचीच पडटा. तशेंच हेर सुरक्षेचे उपाय करप बंधनकारक आशिल्ल्याचें वीज खात्यान कळयलां. मुखेल वीज अभियंते स्टीफन फर्नांडीस हांणी ही नोटीस जारी केल्या. जनरेटर वा इन्वर्टर बसोवपा खातीर वीज खात्याची मान्यताय गरजेची आशिल्ल्याचें परिपत्रक वीज खात्यान पोरूं काडिल्लें. दिवचले दुरुस्तीकाम चालू आसतना एका गिरायकान इन्वर्टर सुरू केलो. हाका लागून लायन बंद आसतना लेगीत रिव्हर्स करंट येवन लायनमॅनाक शॉक लागलो. हाचे उपरांत इन्वर्टर आनी जनरेटरचो वापर करतना नोंदणी सक्तीची करपी आदेश वीज खात्यान जारी केलो. हाचे उपरांत मे म्हयन्यांत होंडा वाठारांत शॉक लागून लायनमॅनाक मरण आयलें. हे विशींचो तपास अहवाल अजून सादर जावपाचो आसा. हे घडणुके उपरांत सुरक्षेचे उपाय गरजेचे आशिल्ल्याची नोटीस जारी जाल्या. अर्थींग तशेंच हेर सुरक्षेचे उपाय नासले जाल्यार फौजदारी कारवाय जातली, अशी शिटकावणी नोटिशेंत दिल्या. सुरक्षेचे उपाय नासले जाल्यार लायनमॅन तशेंच वीज खात्याच्या अभियंत्यांक काम करतना धोको निर्माण जावपाची भिरांत आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
