भांगरभूंय | प्रतिनिधी
पेडणें : सुमारा भायर पावस पडत आशिल्ल्यान भातशेतीचें लुकसाण जालांच, ते भायर रोजांच्या फुलांच्या उत्पादनाचेर वायट परिणाम जाला. रोजांचीं फुलां तुळशीच्या लग्नाक आनी हेर सणांक भायल्या राज्यांतल्यान येतात. सरकारान तांचेर बंदी घातली जाल्यार थळाव्या शेतकारांनी लायिल्ल्या रोजांच्या फुलांची मागणी वाडपाक शकता आनी तांकां अर्थीक फायदो जावं येता. दिवाळीच्या उत्सवांत भायल्या राज्यांनी येवपी रोजांच्या फुलांचेर सरकारान बंदी घालची, अशी मागणी शेतकार रवी नायक हांणी केल्या.
चिवई विर्नोड्यांचे रवी नायक आनी श्रेया नायक ह्या जोडप्यान फाटल्या कितल्याश्याच वर्सां सावन आपापल्या शेतांत वेगवेगळे प्रयोग करून भातशेती वांगडाच फळां- फुलांची, शाकभाजयेची लागवड करून शेतकी मळार उड्डाण मारलां. प्रगतशील शेतकार म्हूण तांची मेजणी जाता. पूण अंदूं व्हड प्रमाणार पावस पडत आशिल्ल्यान तांणी लायिल्ल्या रोजांच्या फुलांचेर वायट परिणाम जाला. जर पावस असोच पडत रावलो जाल्यार पयलेच खेपे व्हड प्रमाणार आमकां लुकसाण सोंसचें पडटलें, अशें मत श्रेया आनी रवी नायक हांणी उक्तायलें.
सुमारा भायर पडत आशिल्ल्यान आनी रोजांच्या फुलां फुलपाचो काळ लेगीत मात्सो उसरां आयिल्ल्यान दसरो आनी दिवाळेक फावोशी रोजां फुलूंक नाशिल्लीं. आतां तुळशीच्या लग्ना वेळार व्हड प्रमाणार फुलां फुल्ल्यांत. पावस असोच पडत रावलो आनी सरकारान भायल्या राज्यांतल्यान येवपी रोजांचेर निर्बंध घातले नात जाल्यार, थळाव्या शेतकारांनी लायिल्ल्या रोजांच्या मळ्यांचेर खूब वायट परिणाम जातलो, असो भंय श्रेया आनी रवी नायक हांणी उक्तायलो.
श्रेया आनी रवी नायक हांणी अंदूं 3 हजारां परस चड रोजांचे रोपें लावन, तांची जतनाय घेवन अंदूं रोजांचो मळो फुलयला. ते खातीर शेती खात्या खाला आत्मा संस्थे वतीन तांकां वेळावेळार आदार मेळ्ळो. आतां सरकारान भायल्या राज्यांतल्यान येवपी रोजांच्या फुलांचेर निर्बंध घातले जाल्यार थळाव्यांनी लायिल्ल्या रोजांक बरी मागणी मेळपाक शकता, अशें रवी नायक हांणी सांगलें. श्रेया आनी रवी नायक ह्या जोडप्यान रोजां वांगडा आतां तवशीं लेगीत लायल्यांत. रोजांचो मोसम सोंपले उपरांत काळंगां आनी हेर शेतीचे प्रयोग तें करतले. सरकाराच्या शेतकी खात्या खाला वेगवेगळ्या येवजण्यांचो लाव घेवन सरकारी नोकरे फाटल्यान धांवा नासतना कांय तरणाटे शेती वेवसाया वटेन वळटात. सरकारान ह्या युवा शेतकारांचे प्रस्न आयकून घेवन, तांकां शेतकी मळार आनीक मुखार वचपा खातीर मजत करची, अशीय मागणी नायक जोडप्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
