भांगरभूंय | प्रतिनिधी
-सेंट झेवियर विधान प्रकरणः रातीं उसरां मेरेन लोकांचो पुलीस मुख्यालया मुखार जमावमडगांवः गोंयचो सायब संत झेव्हियर हांचे विशीं सुभाष वेलिंगकार हांणी केल्ल्या विधानाचो निशेध करपा खातीर शुक्रारा सांजवेळा शेंकड्यांनी नागरिकांनी दक्षीण गोंय जिल्लो पुलीस मुख्यालयांत मोर्चा व्हेलो. गोंयभर कागाळी आसून लेगीत अजून मेरेन गुन्यांव नोंद जायना. गुन्यांव नोंद जाय मेरेन निशेध चालू उरतलो अशें सांगून अांदोलकांनी रस्तो आडायलो. येरादारीच्या कोंयडेक लागून वाहन चालकांक त्रास जाले.
सुभाष वेलिंगकार हांणी संत फ्रांसीस झेवियरा विशीं आक्षेपार्ह विधान केले. हाचे उपरांत क्रिस्तांव भावांनी वेलिंगकार हांचे आड गोंयांतल्या वेगवेगळ्या वाठारांतल्या पुलीस स्टेशनांनी कागाळी दाखल केल्यात. हे घडणुकेक तीन दीस जाले तरी अजून पुलिसांनी धर्मीक भावना दुखयिल्ले खातीर गुन्यांव नोंद करूंक ना. ते खातीर सगळ्या धर्मांतल्या नागरिकांनी दक्षीण गोंय पुलीस मुख्यालयाचेर मोर्चा व्हेलो. ह्या वेळार पुलीस मुख्यालयाच्या भायर व्हड पुलीस बंदोबस्त आशिल्लो. उपविभागीय पुलीस अधीक्षक संतोष देसाय आनी मडगांव पुलीस निरिक्षक तुळशीदास नायक हांणी परिस्थितीचेर नियंत्रण दवरपाचो यत्न केलो. ह्या वेळार आमदार क्रूझ सिल्वा, प्रतिमा कुतिन्हो, साविओ कुतिन्हो आनी हेर आंदोलक हाजीर आशिल्ले.
उपरांत दक्षीण गोंयची पुलीस अधीक्षक सुनीता सावंत आयली तेन्ना आंदोलकांनी तिचे कडेन चर्चा केली. राज्यांतल्या वेगवेगळ्या वाठारांतल्यान अायिल्ल्या लोकांनी वेलिंगकारां आड कारवाय करपा विशीं सयो केल्ले निवेदन पुलीस अधीक्षकांक भेटयलें. वेलिंगकार परत परत क्रिस्तांव भावांच्याे धर्मीक भावनां दुखोवपी विधानां करता. तांचे आड कारवाय करपाची गरज आसा. राज्यांतले मंत्री आनी आमदारांनीय ह्या विधानांचो निशेध केला. कायद्या प्रमाण धर्मीक तेढ निर्माण करपी लोकां आड कारवाय करतले, अशें मुख्यमंत्र्यांनी सांगिल्लें. ते प्रमाण वेलिंगकारा आड गुन्यांव नोंद जायना, ते मेरेन आमी रस्त्यार बसतले अशें लोकांनी सांगलें.
कारवाये खातीर रस्ते केले बंद
पुलीस अधीक्षक सुनीता सावंत थंय पावले उपरांत तांणी आंदोलकांक सांगलें, कागाळेची प्रत दिवचल पुलीस स्टेशनाचेर धाडल्या. पूण आंदोलकांनी येरादारी चालू आशिल्ल्या रस्त्यांचेर धांव घेवन वाहनां आडावन गुन्यांव नोंद करपाची मागणी केली. ते खातीर पुलिसांक येरादारी दुसऱ्या मार्गान घुंवडावपाचो वेळ आयलो.
फातोड्डें, कुडतरी पुलिशेंत कागाळ
सुभाष वेलिंगकार हांणी क्रिस्तांव भावांच्यो भावना दुखयल्यात. हाची दखल घेवन अँथनी बार्बोझा हांणी राय पंचायत वांगड्या सयत मायणा- कुडतरी पुलिशेंत कागाळ नोंद केल्या. वेलिंगकारा आड कारवायेची मागणी केली. हाचे भायर मिलाग्रीस फर्नांडीस हांणी नागरिकां सयत फातोड्डें पुलिशेंत कागाळ दाखल केल्या.
दक्षीण गोंय काँग्रेसी कडल्यान कारवायेची मागणी
दक्षीण गोंय जिल्लो काँग्रेस समितीच्या पदाधिकाऱ्यांनी पत्रकार परिशद घेवन सुभाष वेलिंगकार हांच्या निवेदनाचो निशेध केलो. मुसलमान भावां विशीं उलोवपा खातीर काणकोण वापरतात. ते उपरांत कुकळ्ळी मुसलमान भावाक मारपेट केली आनी आतां वेलिंगकार हांणी संत फ्रांसीस झेवियरा विशीं केल्ल्या विधानाक लागून राज्यांत धर्मीक फूट वाडत आसा. ते खातीर तांचेर गुन्यांव नोंद करून तांचे अटकेची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
