भांगरभूंय | प्रतिनिधी
नवी दिल्ली, खबरां संस्था: सुप्रीम कोर्टाचें यूट्यूब चॅनल शुक्रारा हॅक जालें. रिपल लॅब्सान विकसीत केल्ल्या यूएस-आदारीत क्रिप्टोकरन्सी XRP चो प्रचार करपी व्हिडिओ सर्वोच्च न्यायालयाच्या युट्यूब चॅनलाचेर लायव्ह आशिल्ले. “Brad Garlinghouse: Ripple न SEC च्या $2 बिलियन दंडाचेर प्रतिक्रिया दिली! XRP किंमतीचो अदमास’’ अशे तरेच्या माथाळ्याचो रितो व्हिडिओ हॅक केल्ल्या चॅनलार लायव्ह आशिल्लो.
ह्यान पयलीं हॅकर्सांनी चॅनलाचें नांव बदलून आदले सुनावणेचे व्हिडिओ खाजगी केल्ले. आतां कम्युनिटी गायडलायन हिंसाचाराक लागून युट्युबान चॅनल काडून उडयल्या. ह्या चॅनलार सर्वोच्च न्यायालयाच्या घटनापीठा सामकार येवपी खटल्यांची सुनावणी आनी जनहिता कडेन संबंदीत प्रकरणांचें सरळ प्रक्षेपण करतात. हालींच आरजी कर मेडिकल कॉलेज, बलात्कार आनी खुनाचा सुनावणी लायव्ह केल्ली.
सर्वोच्च न्यायालयाच्या एका वरिश्ठ अधिकार्यान सांगलें, खरें कितें जालें हाची आमकां खात्री ना. सर्वोच्च न्यायालयाच्या अधिकृत युट्युब चॅनलाची समस्या शुक्रारा सकाळीं उजवाडाक आयली आनी ती सुटावी करपा खातीर सर्वोच्च न्यायालयाच्या आयटी पंगडान नॅशनल इन्फोमटिक्स सेंटर (एनआयसी) कडल्यान मदत मागल्या अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
