भांगरभूंय | प्रतिनिधी
भांगरभूंय । खेळां मेज
पणजीः पीजीएमएल टी-20 क्रिकेट लिगांतले आयतारा जाल्लें निमाणे मेरेन उमळशीक वाडोवपी मॅचींत मानस मॅव्हरीक्स पंगडान धेंपो चलेन्जर्सांक सुपर ओव्हरींत हारयलें. पणजे जिमखाना मैदानार आयतारा जाल्ले दुसरें मॅचींत प्रायोरिटी टायटन्सान पोरूंचो वस्ताद प्रेसकॉन पँथर्साक 8 धांवड्यांनी हारोवन आपल्या तिसऱ्या जैताची नोंद केली.
धेंपो- मानस मॅचींत सुपर ओव्हरींत मासच्या खेळगड्यांनी 12 धांवड्यो केल्यो जाल्यार धेंपो चलेन्जर्स फकत 9 धांवड्यो करपाक शकलो. ताचे पयलीं धेंपोच्या खेळगड्यानी आपल्या 20 ओव्हरींत 6 बाद 138 धांवड्यो केल्यो. किरण शिरवयकारान सगल्यांत चड 36 धांवड्यो केल्यो. मॅन ऑफ दी मॅच थारल्ल्या जमीर कारोलान 3 ओव्हरींत 12 धांवड्यो दिवंन धेंपोच्या तीन बॅट्समनांक आवट केलें.
मानस मॅव्हरीक्साच्या मदल्या फळींतल्या मनीष काकोडे आनी सुनील राठोडान दरेकी 34 आनी 37 धांवड्यो केल्यो. मात ताचें हेर खेळगडे फटाफट बाद जाले आनी तांचो डाव 138 धांवड्यांत सोपलो. वल्लभ हळदणकारान 17 धांवड्यांत 3 विकेटी घेतल्यो. मॅचीचो निकाल लावपा खातीर सुपर ओव्हर खेळोवची पडली. तातूंत धेंपोक हार खावची पडली.
टायटन्सांक जैत
दुसरे मॅचींत 31 बॉलांत 40 धांवड्यो करून वेदान्त नायकान प्रायोरिटी टायटन्साक तांच्या डावांत 9 बाद 128 धांवड्यो करपाक योगदान दिलें. विवेक कारापुरकारान 16 धांवड्यांत 2 विकेटी घेतल्यो. प्रेसकॉन पँथर्साचो ओपनर मेहूल जिरगेन 29 धांवड्यांत 34 धांवड्यो केल्यो. ताचें सात बॅट्समन दोन आंकडी धांवड्यो करपाक शकले नात. तांचो डाव 9 बाद 120 असो सोपलो आनी टायटन्सांक 8 धांवड्यांनी जैत मेळ्ळें. टायटन्साच्या मोहन खोलकारान 3 ओव्हरींत 11 धांवड्यो करून 4 विकेटी घेतल्यो आनी तो मॅन ऑफ दी मॅच थारलो.
21 जानेवारीक जावपी मॅचींत आरजी गोंय आनी बाले टायगर्स आनी प्रेसकॉन आनी धेंपो मदीं मॅची जातल्यो. फाटल्या 7 जानेवारीक पीजीएमएल लीग सर्ती सुरू जाल्ली. 5 फेब्रुवारीक फायनल जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
