भांगरभूंय | प्रतिनिधी
भारतांतले अब्जाधीश मुकेश अंबानी, गौतम अदानीय हांचो आस्पाव
नवी दिल्ली, खबरां संस्था ः संवसारांतल्या अब्जाधीशांची संख्या वाडत आसतनाच ‘सुपरबिलियनेयर’ची नवी वळेरी मुखार आयल्या. हातूंत अशा अब्जाधीशांचो आस्पाव जाता, जांची वट्ट संपत्ती 4.35 लाख कोटी रुपया (50 अब्ज डॉलर) वा ताचे परस चड आसा. हातूंत भारतांतले अब्जाधीश मुकेश अंबानी, गौतम अदानी हांचे सयत जेफ बेजोस, मार्क जुकरबर्ग, वॉरेन बफे हांचो आस्पाव आसा.
वॉल स्ट्रीट जर्नलाच्या अहवाला प्रमाण, हे वळेरेंत 24 सुपरबिलियनेयरांचो आस्पाव आसा. तातूंतले 16 सेंटी बिलियनेयर आसात. तांची संपत्ती 8.71 लाख कोटी रुपया (100 अब्ज डॉलर) वा ताचे परस चड आसा. टेस्ला, स्पेसएक्स, न्यूरालिंक सारकिल्ल्या कंपनींचे धनी एलन मस्क पयल्या क्रमांकाचेर आसा. म्हणल्यार ते सगळ्यांत गिरेस्त व्यक्ती. तांची संपत्ती एका सरासरी अमेरिकन कुटुंबाचे संपत्ती परस 20 लाख पटींनी चड आसा.
गिरेस्त आनी गरीब हांचे मदलो फरक वाडलो
तज्ञांच्या मतान गिरेस्त आनी गरीब हांचे मदलो फरक वाडला हें ह्या प्रवृत्तींतल्यान दिसून येता. अमेरिकेंत सगळ्यांत गिरेस्त 1% लोक देशाचे वट्ट संपत्तींतले 30% संपत्तीचे मालकीचे आसात. 1980 च्या दशका परस हें प्रमाण खूब चड आसा. आदींच्या तुळेंत सध्याच्या अब्जाधीशांची गिरेस्तकाय फाटल्या कांय वर्सांत जायत्या पटींनी वाडल्या. देखीक, मस्क आनी बेजोस हांची गिरेस्तकाय फाटल्या कांय वर्सांत अब्जांनी डॉलरांत उतार-चढाव जाल्या.
मुकेश अंबानींची संपत्ती 7.90 लाख कोटी रुपया
सुपरबिलियनेयर वळेरेंत रिलायन्स इंडस्ट्रीजचे चेअरमन मुकेश अंबानी हांची वट्ट संपत्ती 7.90 लाख कोटी रुपया आसा. दुसरे भारतीय अब्जाधीश गौतम अदानी हांची संपत्ती 6.52 लाख कोटी रुपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
