भांगरभूंय | प्रतिनिधी
घ डणुके उपरांत फकत आठ वरां भितर प्रदर्शीत जाल्लें ताचें कोंकणी कांतार ज़ुआरी पुलाचेर जाल्ल्या दुखेस्त अपघाताचेर एक दिसांत 1 लाख 12 हजार व्ह्यूज करून युट्युबाचेर विक्रमी गीत म्हूण सिद्ध जालें. हो ताणें केल्लो पयलो पराक्रम न्हय, कारण चडशे फावटीं घडणुके उपरांत कांय वरां भितर तो आपलो गीत- व्हिडियो अपलोड करपाक येसस्वी जाला आनी कोंकणी कांतार मळाचेर आतां मेरेन ताचे इतली गती कोणाक मेळूंक ना. तो गोंयचो अभिमान, एडविन डी’कोस्ता, कोंकणी कांतर जगांतलो सगळ्यांत वेगान संगीतकार, जो पयसुल्ल्या आखातांत गोंया भायर काम करता, पूण आपल्या मूळ राज्यांतल्या दर एका ल्हान- ल्हान घडणुकांचो हिशोब दवरता आनी आपल्या संगीत, म्होवाळ प्रतिसादान खिणा भितर ती वाऱ्यार (युट्यूबार) सोडटा.
म्हान गायिका लता मंगेशकारान निमाणो उस्वास घेतलो तेन्ना एडविनानच आपलें कोंकणी गीत ‘लता मंगेशकर सोंपली’ हें गीत तिच्या मरणाची खबर आयले उपरांत आठ वरां भितर अपलोड केलें. तशेंच ताचें ‘क्वीन एलिझाबेथ सोंपली’ हें गीत इंग्लंडाचे राणीक श्रद्धांजली ओंपपी आशिल्लें. भूंयकांप ताका हालोवंक शकलो ना आनी तुर्कस्तानांतल्या लोकांची राखण करपाची प्रार्थना करून तो तुर्कस्तानांतल्या भूंयकांपा उपरांत 24 वरां भितर कांतार करपांत येशस्वी जालो. नुव्यां मानगें दिसपाची एक ल्हानशी घडणूक लेगीत ह्या मास्टर संगीतकाराक ‘नुव्यां मानगें आयलें’ हें गीत बरोवपाची प्रेरणा दिता – गीतांचें सगळें श्रेय, गायन, चित्रीकरण आनी संपादन स्वता कडेन घेता.
राजकी नदरेन गरम विशय ताचे आवडीचे आनी वयल्या पांवड्यावेल्या राजकारण्यांचेर जेन्ना जेन्ना ते चुको करतात तेन्ना तो तितलेच सोंपेंपणान टिका करता, कारण तांच्या बऱ्या कर्तुबां खातीरय तोखणायेचीं उतरां तो बरयता.
“मोपा हांगाच्या मनोहर आंतरराष्ट्रीय विमानतळार वॉशरूम भायर गोंयांतलें युनेस्कोचें दायज स्थळ बोम बॅसिलिकाचो फोटो दाखोवपी सायनबोर्डाचें चित्र जेन्ना व्हायरल जालें, तेन्ना हळदोणेंचो आमदार एड. कार्लोस आल्वारीस फरेरान हो प्रस्न लोकां मुखार मांडलो आनी उल्लेख केल्लो सायनबोर्ड काडून उडोवपाची कागाळ दाखल केली. ह्या विशयाचेर गीत बरयलें आनी गोंयांतल्या हजारांनी कॅथलिकांच्या भावनांक दुखोवपी ह्या संवेदनशील विशयाचेर लोकांक जागृत करपाचो यत्न केलो अशें एडविनान ‘भांगरभूंय’ कडेन उलयतना सांगलें.
ताका जायते भोवमान आनी पुरस्कार मेळ्ळ्यात. हो सगळ्यांत वेगवान संगीतकार दशकां सावन संवसारभरांतल्या गोंयकार लोकांक आपली संगीत सेवा दिता, फकत आपलो वेळ, उर्जा, पयशे खर्च करून आपल्या गितांचो व्हिडियो युट्युबाचेर सोडना, पूण तरणाट्यांक ताचे सारकें जावंक, ताच्या पावलांचेर पावल दवरपाक फुकट
प्रशिक्षण दिवन – एक मुद्दो उखलून इंटरनॅटाचेर गीत बरोवपाक आनी तें त्या दिसाचो हुनहुनीत विशय जावपाक उर्बा दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
