भांगरभूंय | प्रतिनिधी
मुंबय, खबरां संस्थाः राष्ट्रवादी काँग्रेसीचे (अजीत पवार गट) अध्यक्ष आनी राज्याचे उपमुख्यमंत्री अजीत पवार हांच्या मरणा उपरांत तांची घरकान्न आनी राज्यसभा खासदार सुनेत्रा पवार हांची महाराष्ट्राच्या उपमुख्यमंत्री पदाचेर नेमणूक निश्चित जाल्या. आयज शेनवारा, 31 जानेवारीक सांजवेळार सुनेत्रा पवार उपमुख्यमंत्री पदाची सोपूत घेतली. महाराष्ट्राच्या इतिहासांत ह्या पदाचेर नेमणूक जाल्ली ही पयली महिला आसतली.
अजीत पवार हांच्या मरणा उपरांत निर्माण जाल्ली पोकळी भरप शक्य ना. राष्ट्रवादी काँग्रेस पक्षाच्या विधीमंडळाची बसका आयज दनपारां 2 वरांचेर विधानभवनांत जाली. हे बसकेंत सुनेत्रा पवार हांची विधीमंडळ पक्ष फुडारी पदाचेर अधिकृतपणान निवड केली अशी म्हायती वरिश्ठ फुडारी छगन भुजबळ हांणी दिली. थोड्याच वेळांत ‘लोकभवनां’त सोपूत सुवाळो जातलो.
ह्या राजकी घडणुकांचेर प्रतिक्रिया दितना मुख्यमंत्री देवेंद्र फडणवीस हांणी म्हणलें, उपमुख्यमंत्री पदा संबंदीं राष्ट्रवादी काँग्रेस पक्षान खंयचोय निर्णय घेतलो, ताका आमी तेंको दितले. अजीत दादांच्या कुटुंबा फाटल्यान आनी पक्षा फाटल्यान आमी खंबीरपणान उबे आसात.
सुनेत्रा पवार सध्या राज्यसभेची वांगडी आसा. 2024 वर्साचें वेंचणुकेंत तिणें बारामती लोकसभा मतदारसंघांतल्यान सुप्रिया सुळे हांचे आड वेंचणूक लढयल्ली. आतां राज्याच्या राजकारणांत तिची म्हत्वाची भुमिका आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
