भांगरभूंय | प्रतिनिधी
भांगरभूंय । प्रतिनिधी
वास्कोः गोंय क्षत्रीय मराठा खारवी समाजा वतीन दर वर्सा दितात ते “शिवबा”आनी “जिजाऊ” पुरस्कार अंदू मुरगांवचो नगरसेवक आनी पत्रकार सुदेश भोसले आनी सडा हांगच्या दीपविहार हायस्कुलाची शिक्षिका रेषा शेट हांकां दिला. पुरस्कारांची घोशणा समाजाच्या जोड बसकेंत अध्यक्ष वासुदेव साळगांवकार हांणी केली. समाजा वतीन शिवजंयती उत्सव 10 मार्चाक बायणा हांगच्या रवींद्र भवनांत वेगवेगळ्या कार्यावळीनी मनयतले.
मुरगांव खारवी समाजा वतीन फाटल्या धा वर्सा सांवन समाजाचे जडणघडणी आनी वेगवेगळ्या मळार उल्लेखनीय कामगिरी करपी समाजांतल्या लोकांक शिवबा आनी जिजाऊ पुरस्कार दितात. रोख 10 हजार रुपया, मानचिन्ह आनी भेटवस्तू अशें ह्या पुरस्काराचे स्वरून आसा. समाजाच्या सर्गेस्त लक्ष्मण फडते सभाघरांत जाल्ल्या मुरगांव खारवी समाजाचे बसकेंत आंतरराष्ट्रीय बायल दीस मनोवपाचो निर्णय घेतलो. ह्या शिवाय पतंजली- गोंय वतीन योगाभ्यासाचे वर्ग चालू करपाचे थारायलें. बसकेक समाजाचो कार्याध्यक्ष शशिकांत ढोलये, उपाध्यक्ष घनश्याम गाड, प्रभारक ढोलये, बायल समिती अध्यक्ष शुभांगी फडते, गीता तांडेल, प्रविण दाभोलकार, राजेश हळर्णकार, प्रमोद दाभोलकार आनी हेरांनी वांटो घेतलो. सरचिटणीस सतीश वळवयकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
