भांगरभूंय | प्रतिनिधी
पयल्या डावांतलो खेळ रोखडोच सोंपिल्ल्यान भारत पयल्या डावा उपरांत मॅचींत फाटीं पडिल्लो. पूण, दुसऱ्या डावांत साई सुदर्शन आनी देवदत्त पडिक्कलान दिसाचे अखेर मेरेन 178 धांवड्यांची भागिदारी केली आनी भारताचो धांवसंख्या 200च्या मुखार व्हेली. दोगूय शेंकड्यांच्या लागसार आसात. जाल्यार भारतान 2 विकेटी व्हगडावन दुसऱ्या दिसाचो खेळ सोंप मेरेन 208 धांवड्यो करून 120 धांवड्यांची आघाडी घेतली.
भारताचो पयलो डाव फकत 107 धांवड्यांचेर सोंपिल्लो. हातूंत भारताच्या फकत तिनूच बॅट्समनांनी दोट्टी आंकडो हुपिल्लो. जाल्यार मुखेली ऋतुराज गायकवाडा सयत भारताचे तीन बॅट्समन शुन्याचेर बाद जाल्ले. ऑस्ट्रेलिये वतीन ब्रॅण्डन डगेटान 6 विकेटी घेतल्यो.
ऑस्ट्रेलियेचो लेगीत डाव बेगीन सोंपलो. मदले फळयेंतल्या बॅट्समनांनी डाव सांबाळपाचो यत्न केलो. पूण, तांकां येस मेळूंक ना. बिवू वेबस्टर आनी कुपर कॉनोली हे जोडयेन चवथे विकेटी खातीर 51 धांवड्यांची भागिदारी केली. पूण, ताच्या एकाय बॅट्समनाक व्हड खेळी करपाक जमली ना. ब्रॅण्डन डगेटा भशेन भारताच्या मुकेश कुमारान ऑस्ट्रेलियेच्या 6 बॅट्समनांक बाद केले आनी ताचो डाव 195चेर सोंपयलो. ऑस्ट्रेलियेन 88 धांवड्यांची आघाडी घेतली. भारताक दुसऱ्या डावांत जबरदस्त प्रदर्शन करून मॅचींत पुनरागमन करपाची संद आशिल्ली.
भारतान संदीचो फायदो घेत मॅचींत पुनरागमन केलें. मुखेली गायकवाड (5) आनी अभिमन्यु ईश्वरन (12) रोखडेच बाद जाले. पूण, साई सुदर्शन (96) आनी देवदत्त पडिक्कल (80) शेंकड्याच्या हुमऱ्यार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
