भांगरभूंय | प्रतिनिधी
गुजरात टायटन्सान इंडियन प्रिमीयर लिगेचे (आयपीएल) फायनलींत जबरदस्त बॅटिंग केली. चेन्नय सुपरकिंग्सान सोडिल्ल्यो कॅची, सुमाराची फिल्डींग गुजरात टायटन्साक फायद्याची थारली. महेंद्रसिंग धोनीन फॉर्मांत आशिल्ल्या शुभमन गिलाक स्टंप बाद करून विकेट मेळयली. पूण, वृद्धिमान साहा आनी साई सुदर्शन हांणी अर्द शेंकड्यांची खेळी करतना चेन्नय सुपरकिंग्साच्या बॉलरांची बॉलींग फोडून काडली आनी गुजराताक मोठी धांवसंख्या उबारून दिली.
ते पयलीं शुभमन गिल आनी वृद्धिमान साहा हांणी पंगडाक सादूरतायेन सुरवात करून दितना 67 धांवड्यांची भागिदारी केली. तुषार देशपांडेचे दुसरे ओव्हरींत स्क्वॅर लेगांत दीपक चहरान शुभमनाची सोंपी कॅच सोडली. ते उपरांत शुभमनान गियर बदलून चवक्यांचो पावस गालो. साहान लेगीत ताच्या पावलाचेर पावल दवरलें. सगलें कितें बरें गुजराता वटेन घडटा आसतना सातवे ओव्हरीचो निमाणो बॉल रवींद्र जडेजान वेगान घालो आनी तो शुभमनाच्या बॅटाच्या लागिच्यान गेलो. धोनीन तितकेच फिशालकायेन बॅल्स उडोवन शुभमनाक स्टम्प बाद केलो. गिल 39 धांवड्यो करून तंबूंत परतलो.
शुभमन गिल बाद जाल्या उपरांत लेगीत गुजराताच्या धांवड्यांचो वेग उणो जावंक ना. चेन्नय सुपरकिंग्स शुभमनाचो अभ्यास करून मैदानांत देंविल्लो. पूण, साहान आक्रमक बॅटींग करून तांची रणनिती इबाडपाचो यत्न केलो. ताणें उत्कृश्ट शॉर्ट मारले आनी ताका साई सुदर्शनान संयमी खेळी करून ताका बरी साथ दिली. साहान 36 बॉलांनी अर्द शेंकडो पुर्ण केलो.
साहा आनी सुदर्शन हांणी 42 बॉलांनी 64 धांवड्यांची भागिदारी केली. अखेरेक दीपक चहरान ही जोडी फोडली. साहान सको मारपाचो यत्न केलो. पूण, ताचो थंयच्याच थंयच वयर गेलो आनी धोनीन सोंपी कॅच धरली. साहान 39 बॉलांनी पांच चवके आनी एक सक्या सयत 54 धांवड्यो केल्यो.
15 ओव्हरींनी गुजरातान 2 बाद 143 धांवड्यो केल्ल्यो. अखेरच्या पांच ओव्हरींनी धांवड्यांचो पावस पडलो. सुदर्शनान 33 बॉलांनी अर्द शेंकडो पुर्ण केलो. ताणें सहज रितीन शॉर्ट मारले.
सुदर्शनान सहज रितीन चेन्नयच्या बॉलरांची बॉलिंग खेळून काडली. तुषारान घाल्ले 17वे ओव्हरींत सुदर्शनान 6,4,4,4,1,1 अश्यो वट्ट 18 धांवड्यो केल्यो. ते उपरांत मुखेली हार्दिक पांड्यान लेगीत हात मेकळे केले. 20वे ओव्हरींत सुदर्शनान दोन सके मारले. पूण, तिसऱ्या बॉलाचेर पथिराणान ताका एलबीडब्ल्यू बाद केलो. सुदर्शनान 47 बॉलांनी आठ चवके आनी स सक्यांचे मजतीन 96 धांवड्यो केल्यो. गुजरातान 4 विकेटी वगडावन 214 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
