सुण्या परस गाय पोसात, अनुदान घेयात

भांगरभूंय | प्रतिनिधी

मुख्यमंत्रीः पांच गायी पोसप्यांक मेळटलें अर्थीक अनुदान

भांगरभूंय । प्रतिनिधी

सांखळीः गोंयांत गायी पोसपा खातीर सरकार अर्थीक बळगें दितलें. एका घरांत उण्यांत उण्यो पांच देशी गांवठी गायी आसल्यार त्या घराक दर दिसा सरकार दर गायी प्रमाण 80 रुपया दितलें, अशी घोशणा मुख्यमंत्री डॉ. प्रमोद सावंत हांणी सांखळे केली. हे येवजणेची अधिसुचोवणी बगिनूच काडटले. घरांत एकादो प्राणी पोसपाचोच आसल्लयार सुण्यां परस गाय पोसात, असो सल्लो मुख्यमंत्र्यान ह्या वेळार दिलो.

विश्व हिंदू परिशदेक 60 वर्सां पिराय जातात. ते खातीर सांखळे विश्व हिंदू संमेलनाचें आयोजन सांखळेच्या श्री राधाकृष्ण मुरलीधर संस्थानाच्या सभाघरांत केलां. ह्या संमेलनांत मुख्यमंत्री उलयताले. ह्या वेळार माचयेर विश्व हिंदू परिषदेचे विभाग मुखेली संजय नायक, सांखळीचे मुखेली संतोष भगत, सांखळी भाजप मंडळ अध्यक्ष गोपाळ सुर्लकार, उपनगराध्यक्ष आनंद काणेकार, भानुदास जोशी, राधाकृष्ण मुरलीधर संस्थानचे अध्यक्ष राजदत्त मापारी आनी हेर मानेस्त हाजीर आशिल्ले.

पांच गायी ह्या हिशेबान दर दिसा 400 रुपया आनी म्हयन्याक वट्ट 12 हजार रुपया एका घराक मेळटले. तशेंच गायी पासून मेळपी शेण, गोमुत्र, हाचो वापर सेंद्रीय शेती खातीर जाव येता. ते खातीर सरकार सवलत दिता. हाचो लाव घेवन आतां गोंयांतल्या लोकांनी फक्त गांवठी देशी गायी पोसपाक मुखार सरचें, अशें मुख्यमंत्री डॉ. सावंत हांणी सांगलें.

गोंयांत समान नागरी कायदो बरे तरेन पाळटात. आयज देशांत निधर्मी नागरी कायदो लागू जावचो, ही मागणी आसा. ते संबंदांत प्रधानमंत्री नरेंद्र मोदी हांणीय आपल्या स्वातंत्र्य दिसाच्या भाशणांत उल्लेख केला, अशेंय मुख्यमंत्री डॉ. सावंत हांणी सांगलें.

हे कार्यावळींत हेर मानेस्तांचींय उलोवपां जालीं.

‘भोवसंख्यांक केन्ना अल्पसंख्यांक जातलें कळचें पसून ना’

देशांत सर्वधर्मियांचो वावर चल्ला. ते करपाची सवलत लेगीत हांगा आसा. तांची केन्ना नसाय करिनात. सगळ्यांत स्वातंत्र्य आसा. पूण अशें करतना कांय हिंदू धर्मियूच विचारतात, फक्त विश्व हिंदू परिशदेचेंच काम करपाची कसली गरज आसा? ह्या प्रस्ना परस आमी आयज भोवसंख्यांक आसले तरी केन्ना अल्पसंख्यांक जातले, हे कळचें लेगीत ना. ते खातीर विश्व हिंदी परिशदेचें काम करपाक जाय आनी सदांच सतर्क रावपाक जाय, अशें मुख्यमंत्री डॉ. प्रमोद सावंत हांणी सांगलें.