भांगरभूंय | प्रतिनिधी
रस्ताद सुण्यांची समस्या सगल्याकूच आसा. तांचो बंदोबस्त जावपाक जाय, पूण तो करपांत स्वराज्य संस्थांक अपेस आयलां. मदीं मदीं प्राणीमोगी, ‘पेटा’ बी बेजार जाता. हे सुणे रातचे भुंकून लोकांक शांत न्हीदपाक दिनात. वयर ल्हान भुरग्यांचेर हल्लो करतात. आमच्या धाकटुल्या गोंयांत पसून सुण्यांच्या हल्ल्यांक लागून भुरग्यांक मरण आयलां. बरेच लोक जखमीय जाल्यात. मात हाचे आड बरयत, उलयत जाल्यार कांय प्राणीमोगींक उस्तुरें वता. आतां सर्वोच्च न्यायालयान रस्ताद सुण्यां विशीं एका निर्देश दिला. गुरुग्राम, नोयडा, गाझियाबाद सयत दिल्ली एनसीआर वाठारांतल्या सगल्या रस्ताद सुण्यांक आठ सप्तकां भितर निवारो घरांत हालोवचे. तांचें निर्बिजीकरण (कापांव) करचें, रॅबीस वासिन दिवचें, कामगार, सीसीटीव्ही कॅमेऱ्यांचीय वेवस्था करची अशें न्यायालयान म्हणलां. जो कोण मनीस वा संस्था ह्या कामांत आडमेळीं हाडटा, तांचेर कडक कारवाय करची, असो आदेशूय दिला.
दिल्ली वाठारांत पांच हजारां वयर रस्ताद सुणीं आसात खंय. तांचो लोकांक त्रास जाता. हालींच स वर्सां पिरायेच्या छवी शर्मा हे चलयेक सुण्यांच्या हल्ल्यांत मरण आयलें. रॅबिजाचीं प्रकरणां मेळ्ळीं. म्हणटकच सर्वोच्च न्यायालयाक मदीं पडचें पडलें. तांच्या निर्देशाक लागून अर्थांत प्राणीमोगी बेजार जाल्यात, पूण दोन पायांच्या प्राण्यांचो म्हणल्यार मनशांचोय विचार जावंक जाय. न्यायालयान एका सप्तका भितर हल्ल्याची कागाळ करपाक हेल्पलायन सुरु करपाक सांगल्या. कागाळे उपरांत चार वरां भितर तो सुणो धरचो. सगल्यांक रॅबिजाचें वासीन मेळटलें, हाची तजवीज करची, अशेंय सांगलां. दिल्लींत सद्दां सुणीं चाबपाच्यो घडणुको घडटात खंय, आतां पांच इंजेसांवानी काम जाता. पूण भुरग्यांक, जाण्ट्यांक मनस्ताप सोंसचो पडटा. तातूंत ताका रॅबीज जावपाची भिरांत सतायता. व्हडलो हल्लो जाल्यार मरणूय येता. भौशीक सुरक्षा ही म्हत्वाची. तेन्ना दिल्लींतूच न्हय, तर पुराय देशांत जंय- जंय सुण्यांची समस्या आसा, थंय सुणीं चाबचीं नात हे खातीर
उपाय घेवंक जाय.
फाटल्या 40 वर्सां सावन गोंयांत सुण्यांचें निर्बिजीकरण जाता आसतलें. म्हणटकच वर्सां उलगतात, तसो सुण्यांचो आंकडो देंवपाक नाका? मागीर तो वाडटा कसो? हाचो अर्थ कांय सुण्याचें निर्बिजीकरण जायना वा केल्यारुय ते यशस्वी जायना. दिल्लींतली परिस्थिती ‘सामकी गंभीर’ अशें निरीक्षण न्यायालयान नोंद केलां. वास्तवीक सुण्यांची समस्या सोडोवपांत म्हत्वाचें योगदान स्वराज्य संस्था दिवपाक शकता. तांकां त्या कामा खातीर योग्य तितलो निधी मेळूंक जाय. सुण्यांक नेमान खावपाक, पिवपाक, वखदां, वासिना दिवंक जाय. तांकां लोकवस्तेच्या भायर थारावीक जाग्याचेर दवरपाक जाय. तशें केल्यार तांकां खाण घालपी प्राणीमोगींक पसून थंय वचून तांची सेवा करपाक मेळटली.
एका अदमासा प्रमाण, गोंयांत रस्त्यार रावपी 56,000 परस चड सुणीं आसात. हाचे आदीं तो आंकडो 27,864 इतलो आशिल्लो. म्हणटकच तो दुपेट वाडला. सुणीं चाबपाच्यो घडणुकोय वाडल्यात. 2022 त 8057, 2023 त 11,904 तर 2024 त 17,236. म्हणल्यार दोन वर्सांत कितली वाड जाली ती पळयात. दर्यावेळांचेरुय सुणीं चाबपाचे प्रकार देडशें ते पांचश्यां वयर जाल्यात. थळाव्यांक ते चाबल्यातूच, पूण पर्यटकांकूय तांणी प्रसाद दिला. हाका लागून पर्यटनाचेर परिणाम जावं येता. फोंडें हाॅस्पिटलांत म्हयन्याक 90 दुयेंती मेळटात. पुराय राज्यांत दर 15 मिनटांत एकल्याक सुणो चाबता. आतां तर घरांतल्या आक्रमक सुण्यांनीय हल्ले केल्यात. कांय जाती पोसपाचेर सरकारान बंदी घालची पडली, हाचे वयल्यान परिस्थितीचो अदमास येतलो. रस्ताद सुण्यांचो, हेडग्या गोरवांचो बंदोबस्त हो जावपाकूच जाय. कारण तांकां लागून जीव वगडावपाचो वेळ गोंयकारांचेर जायते फावटी आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
