भांगरभूंय | प्रतिनिधी
दुर्गाभाट – फोंडेंची घडणूक; आवय वांगडा आयिल्लें आजयेगेर
भांगरभूंय । प्रतिनिधी
फोंडें : दुर्गाभाट – फोंड्यां रस्त्याद सुण्यांच्या हल्ल्यांत नबिया शेख ह्या दोन वर्सां पिरायेचे चलयेक मरण आयलें. ही घडणूक शुक्रारा सकाळीं 6.30 वरांच्या सुमाराक घडली. रस्त्याद सुण्यांच्या उपद्रवांचेर नियंत्रण नाशिल्ल्यान थळाव्या लोकांनी सरकाराक दुशण दिलां.
सीसीटीव्ही फुटेजींत दिसा ते प्रमाण नबिया गेटी भायर सरून रस्त्यार येता. कांय अंतराचेर चलून गेले उपरांत सुमार 15 सुण्यांच्या पंगडान ताचेर हल्लो केलो, अशें पुलीस उपअधिक्षक शिवराम वायंगणकार हांणी सांगलें.
चलयेन मजती खातीर बोवाळ मारलो, पूण मजत मेळचे आदींच ती बेशुद्ध जाली. तेन्ना तिचेर हल्लो करपी सुणीं कांय वेळ शांत रावलीं. थळाव्या लोकांनी जखमी चलयेक पळोवन तिका ताकतिकेन हॉस्पिटलांत व्हेली, थंय दोतोरांनी ताका मरण आयिल्ल्याचें जाहीर केलें. सुण्यांनी घांस मारिल्ल्यान चलयेक खूबशे घावे जाल्यात, अशेंय तांणी सांगलें.
घडणुकेची खबर कळटाच फोंडेंचे पुलीस निरिक्षक विजयनाथ कवळेंकार, नगराध्यक्ष आनंद नायक, नगरसेवक रितेश नायक घडणुकेचे सुवातेर पावले.
नबियाचें कुटुंब मूळ उसगांवचें आनी सध्या तें शापूर फोंड्यां रावता. तें आपले आवय वांगडा आजयेच्या घरा रावपाक आयिल्लें. नबियाचे आवय सयत घरांतलीं सगळीं भितर आशिल्लीं. घराचे गेटी मुखार खेळपी नबिया भायर रस्त्यार आयलें तेन्नाच सुण्यांच्या पंगडान तिचेर हल्लो केलो.
नबियाचे कुडीचो पोस्टमार्टम केले उपरांत ताची कूड ताच्या घरच्यांचे सुवादीन दिली. थळाव्या लोकांनी दिल्ले म्हायती प्रमाण ह्या वाठारांत रस्त्याद सुण्यांचो आंकडो खुबूच वाडला. रस्त्या वयल्यान वचपी दुचाकी तशेंच चारचाकी फाटल्यान तीं सुणीं धांवतात. जंय लोक कोयर उडयतात, तातूंत हीं सुणीं खाण सोदून खातात. थंय ह्या सुण्यांचो पंगड चड करून दिसता. हाचे आदींय फोंडें शारांत ल्हान- व्हडांचेर खूब खेपे सुण्यांनी हल्लो केला, पूण पयलेच खेपे तांच्या हल्ल्यांक मरण येवपाची घडणूक घडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
