भांगरभूंय | प्रतिनिधी
सुणो हो मनशाक सामको लागींचो. ताचो इमानदार इश्ट. मात, जायते फावटी तो ताका त्रासदायक थारता. हालींच्या दिसांनी सुण्यांचो उपद्रव वाडिल्ल्याच्यो खबरो येवपाक लागल्यात. सगल्या हाॅस्पिटलांनी सुण्यांनी घांस मारिल्ल्या दुयेंतींचो आंकडो वाडपाक लागला. तशें पळोवंक गेल्यार ही समस्या नवी न्हय. पयलीं सावन हे प्रकार सुरू आसात. पूण, आतां हें आंकडे कळपाक लागल्यात. खरें म्हणल्यार सुणो चाबिल्ले कितले लोक उपचार घेतात, ताचो आंकडो हाॅस्पिटलांनी दर म्हयन्याक जाहीर करूंक जाय. म्हणटकूच रस्ताद आनी घरगुती सुण्याचो उपद्रव कितलो जाता, ताचो अदमास सरकारी प्रशासनाक येतलो. उपरांत हे समस्येचेर उपाय घेवपाक मेळटले. एका फोंडें उपजिल्हो हाॅस्पिटलांत फाटल्या 8 म्हयन्यांत सुणें चाबिल्ल्या 892 जाणांचेर उपचार जाल्यात. म्हयन्याक सादारण 110 घडणुको. हो आंकडो ल्हान न्हय. गांवठी उपचार घेवपी आसचे नात. कारण तो धोको पत्करपा इतले गोंयकार आयज अशिक्षीत उरूंक नात. सुणो चाबूनय उपचार घेवंक नाशिल्लेय आसतले. कारण सुणो भलायकेन बरो आसल्यार इंजेसांवां घेवपाची गरज नासता. ही गजाल फोंडें हाॅस्पिटला पुरती. अशीं कितलीशींच हाॅस्पिटलां, भलायकी केंद्रां गोंयांत आसात. फोंडेंच्या आंकड्या वयल्यान लोकांनी फक्त अदमास करचो.
रस्ताद सुण्यांचो बंदोबस्त करप पालिका, पंचायतींच्या हातांत आसा. तांकां बिगर सरकारी संघटणांचें साह्य मेळूं येता. सुको, ओलो कोयर कुशीक काडपाची, कोयराचो विलो लावपाची यंत्रणा उबारपाचे आदेश न्यायालयान पंचायतींक दिल्यात, तशेंच कांयशे आदेश आतां सुण्यांचे बाबतींत दिवपाचो वेळ आयला. सगल्यांत पयलीं सुणो पोसप्यांची नोंद स्वराज्य संस्थां कडेन आसपाक जाय. ते खातीर परवानो दिवंक जाय. तांची नेमान कुयदाद घेवप जाता काय ना, वखदां, इंजेसांवां दितात काय ना, तेंवूय तपासपाक जाय. घरगुती सुण्यांचीय समस्या सामान्य लोकांक सतायता. ताळगांवां हालींच जाल्ली घडणूक हें एक उदाहरण पुरो! रातच्या वेळार नेमकीं खंय सुणीं आसतात, हें भोंवत जाल्यार कळटा. पालिका, पंचायतींनी हो उपक्रम चालीक लावचो. प्रत्येक स्वराज्य संस्थेन सुण्यां खातीर आसरे बांदपाक जाय. गोरवां खातीरूय. कारण गोरवां पोसप साप्प उणें जाल्लें आसलें तरी आसात तीं गोरवां रस्त्यार भोंवप वाडलां. आदल्या तेंपार राखणे तांची जतनाय घेताले. मात आतां ही संकल्पना ना जाल्या. हालींचे कांय राखणे स्कुटरीचेर बसून रस्त्या वयल्यान म्हशी आमुडटात आनी वाहन चालकांक त्रासांत घालतात. गोरवां प्रमाण सुणींय धोक्याचीं. रातपाळी करून घरा वचप्यांक हें वेगळें सांगपाक नाका. सुण्यांच्यो टोळयोच तांचे फाटल्यान लागतात. मजा म्हणल्यार, हीं सुणी गांवांत चोर येतात, तेन्ना आवाज पसून करिनात!!
रस्त्या कुशीक कोयर उडोवप हें सुणीं, गोरवां रस्त्यार येवपा फाटलें मुखेल कारण. तेन्ना लोकांनी पंचायतींच्या मोनजात निवाऱ्यांनी खाण व्हरून दिलें जाल्यार ही समस्या सुटावी जातली. ताचे पयलीं सगल्या सुण्यांक धरून ह्या निवाऱ्यांनी हाडप पंचायतींचें काम. आमच्या गोंयांत भूतदया म्हणटात ती आशिल्ले शेंकड्यांनी लोक आसात. ते खास गाडयांनी भोंवून सुण्यांक खावपाक घालतात. एकदम बरी गजाल. तांणी पालिका, पंचायतींक हे बाबतींत मजत केल्यार बरी. तशेंच सुण्यांचो उपद्रव लोकांक जावचो ना, हाचेरूय उपाय काडपाक स्वराज्य संस्था, भलायकी खातें आनी हेर सरकारी यंत्रणांच्या पालवान काम करूं येता. सुण्यांचें निर्बिजीकरण करून तांची संतत वाडची ना, हे पळोवपी कांय बिगर सरकारी संघटणा आसात. सरकारूय हें काम करता. मात, रस्ताद सुण्यांचें प्रमाण उणें जावंक ना. ते येतात खंयच्यान? घरांत पोशिल्ले सुणे लोकांनी रस्त्यार सोडल्यार तें रोखडेंच कळटलें आशिल्लें. कारण, सहसा गांवठी सुणे पोसपी लोक उणें! खरें म्हणल्यार सुणेमोगींनी रस्ताद वा पालिकांच्या निवारो घरांतले सुणें पोशिल्लें जाल्यार ही सुण्यांची समस्याच उरची नाशिल्ली. तें कितेंय आसलें तरी सरकारान, थळाव्या स्वराज्य संस्थांनी सुण्यांचो हो उपद्रव गंभीरपणान घेवन कितें तरी उपाय बेगीन करचे. कारण एकाच हाॅस्पिटलांत 8 म्हयन्याक सुणीं चाबपाच्यो 892 घडणुको म्हणजे अतीच जालें. सुण्यांचें निर्बिजीकरण करपी संस्थांच्योय कितें तरी समस्या आसतल्यो. ताचेरूय विचार जावचो. कारण, गांवांनी वचून सुणीं धरप, आपल्या केंद्राचेर हाडून तांचें निर्बिजीकरण करप खर्चीक. चड करून निधीची समस्या आसतली. पालिकांनी ती सोडोवपाक जाय. सुणो हो मनशाचो इश्ट. ताचे कडेन इश्टा सारके वागुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
