भांगरभूंय | प्रतिनिधी
विजयेंद्र अरोरा : योग्य पद्दतीचे नसबंदीची उक्तायली गरज
भांगरभूंय । प्रतिनिधी
पणजी : शास्त्रीय पद्दतीन काम केलें जाल्यार फुडल्या 3 वर्सांत गोंयांतल्या 80 ते 90 टक्के रस्त्याद सुण्यांची नसबंदी करप शक्य आसा. अशें जालें जाल्यार फुडल्या 5 ते 6 वर्सांत रस्त्याद सुण्यांची संख्या नियंत्रणांत येवपाक शकता. ते खातीर गोंय प्राणी म्हासंघ सरकाराक मजत करपाक तयार आशिल्ल्याचें संघटणेचे वांगडी विजयेंद्र अरोरा हांणी सांगलें. शेनवारा पणजे घेतिल्ले पत्रकार परिशदेंत ते उलयताले. तांचे वांगडा प्रकाश कामत, हेमा सरदेसाय आनी हेर वांगडी हाजीर आशिल्ले.
अरोरा हांणी सांगलें, सरकार रस्त्याद सुण्यांचो आंकडो योग्य पद्दतीन सांगिना. नोव्हेंबर 2022 तल्या एका गॅझेटा प्रमाण गोंयांत सुमार 1.40 लाख रस्त्याद सुणीं आसात. ते उपरांत 6 म्हयन्यांत हो आंकडो उणो करून 70 हजार केलो. सध्या गोंयांत वर्साक सुमार 15 हजार सुण्यांची नसबंदी करतात. 70 हजार हो आंकडो गृहीत धरलो जाल्यार दर वर्सा सुण्यांची वाडटी संख्या आनी केल्लें नसबंदीचें प्रमाण खूब उणें आसा. हे खातीर सरकारान आदीं योग्य मुळाव्यो सुविधा निर्माण करप गरजेचें आसा. सरकारान हालींच रस्त्याद सुण्यांचे समस्ये खातीर कृती दळाची स्तापना केल्या. मुळांत हो निर्णय फक्त दिल्ली पुरतो मर्यादीत आशिल्लो. अशें आसलें तरीय आतां सरकार हाचे मुखार रस्ताद सुण्यां खातीर आलाशिरो घर बांदपाचो आसा काय कितें हें स्पश्ट जावपाक जाय. अशें केलें जाल्यार सरकाराक वर्साक 1 हजार कोटी रुपया खर्च येतलो. हाचे बदला शास्त्रीय पद्दतीन नसबंदी केली जाल्यार ताचे खातीर 100 कोटीं परस उणो खर्च येवपाक शकता. एबीसी प्रकल्पाच्या नेमावळीक योग्य पाळो दिलो जाल्यार लेगीत सुण्यांची संख्या नियंत्रणांत येवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
