भांगरभूंय | प्रतिनिधी
गोंयांत 15 एप्रील मेरेन मेजणी उरतली सुरू
पणजी: रस्ताद आनी पोशिल्ल्या सुण्यांचे मेजणेक केंद्र सरकारान आनीक 15 दिसांची मुजत दिल्या. ताका लागून पशुपालन आनी पशुवैजकी खात्या कडल्यान ही मेजणी येता त्या 15 एप्रील मेरेन सुरू उरतली. मेजणी पुराय जाले उपरांतूच राज्यांतल्या पोशिल्ल्या हिंस्त्र सुण्यांचोय आंकडो मुखार येतलो अशी म्हायती खात्याचे संचालक डॉ. नितीन नायक हांणी मंगळारा ‘भांगरभूंय’ कडेन उलयतना दिली.
केंद्र सरकारान अंदूं देशभरांतल्या रस्ताद आनी पोशिल्ल्या सुण्यांची मेजणी करपाचें निश्चीत केल्लें. ते प्रमाण कांय दिसां पयलीं पुराय देशांतल्या सुण्यांचे मेजणीचें काम सुरू जाल्लें. मेजणी पुराय करपाक केंद्र सरकारान सगल्या राज्यांक सुरवातीक 31 मार्च मेरेनची मुजत दिल्ली. पूण तातूंत आतां 15 दिसांनी वाड केल्या. ताका लागून पशुपालन आनी पशुवैजकी खात्या वतीन हें काम येता त्या 15 एप्रील मेरेन सुरू उरतलें अशें डॉ. नायक हांणी सांगलें.
मजगतीं, फाटल्या कांय वर्सांनी गोंयांत हिंस्त्र पोशिल्ल्या सुण्यां कडल्यान ल्हान भुरगीं आनी नागरिकांचेर हल्ले जावपाच्यो घडणुको घडल्यात. अशा सुण्यांच्या हल्ल्यांत कांय भुरग्यांचो बळीय गेला. उपरांत राज्य सरकारान राज्यांतल्या हिंस्त्र जातीच्या सुण्यांचो नेमको आंकडो मेळोवपाचें निश्चीत केल्लें. तशेंच हिंस्त्र जातीच्या सुण्यां कडल्यान एखाद्याचेर हल्लो जायत जाल्यार सुण्याच्या धनयाक जापसालदार धरपाचो निर्णय लेगीत सरकारान घेतिल्लो. आतां सुण्यांचे मेजणेक लागून अशा सुण्यांचो आंकडो मुखार येवन तांचेर नियंत्रण हाडपाक सरकाराक मजत मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
